Presidenti i FIFA-s që mbërriti dje në Tiranë për inaugurimin e “Shtëpisë së Futbollit” dhe festimin e 90 vjetorit të lidhjeve Shqipëri – Fifa, gjatë fjalës së tij përpara të pranishmëve tregoi një detaj me dhuratën shqiptare që mori përherë të parë nga vendi ynë që shkaktoi shumë të qeshura dhe ilaritet tek të pranishmit.
Nga pala shqiptare i ishte dhuruar një shpatë, të cilën Infantino nuk e kishte hapur. Por më pas, çudia i kishte ndodhur në aeroport.
“Për mua të kthehem këtu pas 20 vjetësh dhe të shoh se çfarë ka ndodhur, jam kthyer ndërkohë edhe dy herë të tjera e kjo është vizita ime e katërt dhe sigurisht do të rikthehem shumë më shpesh. Dhe meqë shoh se ka edhe dhurata për tu shkëmbyer, herën e parë që erdha nuk e di nëse të kujtohet, më kanë dhuruar një pako që unë nuk e hapa. Shkova në aeroport, e vendosa në kontrollin e bagazheve më ndaluan dhe më thanë: kjo është e jotja? Po i thashë. Çfarë ka brenda? Nuk e di i thashë është dhuratë.
Atëherë më thanë: eja me ne. Më çuan në një dhomë të vogël. Hape më thanë. E hapa dhe brenda ishte një shpatë shqiptare…dhe me thanë: po me këtë shpatë do të hysh në avion? Epo është një dhuratë e palës shqiptare u thashë. Më lejuan të hyja në avion, po atë ia lanë pilotit dhe më thanë se do të ma jepnin kur të zbrisnim.
Kështu që këtë herë, kujdes me dhuratat, t'i kontrollojmë mirë, që të mos rrezikojmë.
Sidoqoftë, edhe njëherë shumë urime për çka keni bërë dhe faleminderit edhe për mbështetjen. Mund të mbështeteni te Gianni, tek FIFA, unë jam këtu me ju. Jam dhe ndihem shqiptar. Falemnderit”, tha Gianni Infantino.
Lexo gjithashtu
