Partizani u eliminua në “Play-Off” nga Astana, me demat që i japin kështu “lamutmirën” Conference League në një sezon që arriti të shkruante historinë në Europë. Për të parë këtë sfidë nga afër i pranishëm në tribunën e stadiumit ishte dhe Victor Da Silva.
Braziliani për më shumë se 3 javë është i pezulluar nga klubi, ndërsa Zoran Zekic nuk e ka përfshirë në ndeshjet e fundit në Conference. Prania e tij në tribunë, lë të kuptohet se mbase mes palëve tashmë janë ulur “gjakrat”.
Për të përforcuar diçka të tillë ka mjaftuar veprimi i tij në momentin që në zonë e kateringut shikon presidentin e klubit, Gaz Demit. Menjëherë lojtari shkon për ta përshëndetur dhe të dy më pas takohen miqësisht me njëri-tjetrin.
Mbetet të shihet në vazhdim për të mësuar nëse tashmë Zekic do ta rikthejë brazilianin në ekip për sfidat e “Abissnet Superiore”, apo sërish lojtari do të vazhdojë të jetë i përjashtuar nga kroati. Gjithsesi Da Silva e ka “shtri” dorën e pajtimit, ndërsa është në pritje të “paqes” mes palëve.
Lexo gjithashtu
