Vllaznia fitoi me rezultatin e thellë 8-0 sfidën e turit të dytë të Kupës së Shqipërisë ndaj Elbasanit. Ndeshja e zhvilluar në "Loro Boriçi" u mbyll me fitoren e thellë të skuadrës shkodrane që nuk tregoi aspak "mëshirë" për kundërshtarin. Në fund të takimit për mediat trajneri Thomas Brdariç u shpreh tepër i kënaqur për këtë fitore, ndërsa tani e gjithë vëmendja është përqendruar te përballja me Tiranën në kampionat.
"Fituam një ndeshje me rezultat të thellë, takim që e kishim vlerësuar ashtu si duhet, kjo edhe për shkak të surprizave në ndeshjet e djeshme të Kupës. Nuk donim të përballeshim me ndonjë të papritur.
Ia dolëm të fitonim dhe të kualifikohemi në turin tjetër të Kupës. Shoh që qyteti i Shkodrës është i kënaqur me atë që po bëjmë, le të shohim përpara edhe në këtë turne. Jam i kënaqur që shënuan të gjithë sulmuesit, kemi punuar shumë në këtë drejtim edhe është e rëndësishme që po shënojmë.
Aktivizuam edhe disa lojtarë të stolit, por nuk është se do kemi mundësinë t'u japim të gjithëve minutat e duhura. Tani të fokusohemi te Tirana. Na pret një sfidë e vështirë, por rëndësi ka të bëjmë punën tonë", u shpreh Brdariç.
Lexo gjithashtu
