Një gol i Armando Sadikut i ka dhënë Shqipërisë fitoren historike përballë Rumanisë. Një ndeshje e jashtëzakonshme ka sjellë lot gëzimi për të gjithë shqiptarët. Kuqezinjtë e mbyllin aventurën në grupin A në vëndin e tretë duke patur mundësi reale për tu kualifikuar, pasi të përfundoj ky raund për të gjithë grupet. Një super ndeshje, për një super rezultat.
https://www.youtube.com/watch?v=aVctBtnZR6w
Pjesa e parë - Në 10 minutat e para të ndeshjes është skuadra rumune që krijon raste të mira në sulm, por që mbrojtja kuqezi mban qëndrim dhe nuk lejon kundërshtarin që t'i shënojë. Rasti më i mirë është ai i Stancu në minutën e 8, duke goditur drejtpërdrejt në kuadratin e Berishës, por ky i fundit grushton 'predhën' e rumunit. Loja ka vazhduar me epërsinë e rumunëve, të cilët rrisin përqindjen e zotërimit të topit, ndërsa e mbyllin Shqipërinë në mbrojtje. Në minutën e 17 është Matel që gjen të papërgatitur portierin Berisha, ndërsa nis një parabol drejt kuadratit, por sfera përfundon jashtë.
Kur minuta shënon 22 e 40 sekonda, Shqipëria ka rastin më të mirë për të shënuar. Aksion model nga mbrojtja në sulm. Basha pason për Lilën, ndërsa ky i fundit gjen Lenjanin afër portës, i cili gjuan mbi kuadrat. Por, më parë mesfushori i krahut të majtë u gjend në pozicion jashtë loje.
Aksionet e kuqezinjve janë të njëpasnjëshme dhe vënë në rrezik disa herë rumunët. Në minutën e 32 Lenjani i afrohet kuadratit, por në fund humbet sferën, ndërsa gjyqtari nuk i jep goditje dënimi. Ndërsa dy minuta më vonë është Memushaj që kërkon rrjetën, por Tatarushano e nxjerr në këndore. Ekzekuton vlonjati Memushaj goditjen e këndit, ndërsa Bashaj e çon mbi kuadrat.
Pas të gjithë presionit të ushtruar për rreth 30 minuta radhazi, Shqipëria arrin të ndërtojë aksionin model dhe të çojë sferën në rrjetë. Memushaj nga krahu i djathtë i mesfushës fut një top në zonë, ndërsa me kokë Sadiku gjuan drejt kuadratit, duke “hequr qafe”portierin Tatarushano dhe kapitenin Chirches dhe sfera ndalet në rrjetë. Shpërthen festa e Shqipërisë!
Pjesa e dytë – Rumania e nis me zëvendësim pjesën e dytë të ndeshjes, ndërsa Shqipëria tregon edhe një herë egon e saj për të shënuar golin e dytë. Sadiku brenda zonës rrëmbehet nga emocionet dhe nuk kontrollon sferën, duke gjuajtur jashtë kuadratit. Sërish disa minuta më pas skuadra kuqezi rrezikon me anë të Memushajt, por pa mundur të gjejë kuadratin për herë të dytë. Trajneri De Biazi nxjerr nga fusha e lojës autorin e golit, Sadikun, dhe në fushë vendin e tij e merr Balaj, i cili sapo hyn humbet një rast shënimi. Kuqezinjtë e mbajnë skuadrën kundërshtare të mbyllur në mbrojtje, teksa mbrojnë mirë rezultatin. Si pasojë e sulmeve të shumta, kuqezinjtë ushtrojnë presion mbi rumunët dhe duket se goli i dytë është shumë pranë për të tanët. Në minutën e 71 Memushaj tenton kuadratin brenda zonës, por vetëm ngjitur me shtyllën e djathtë pingule të portës së Tatarushano.
Në minutën e 76 rumunët krijojnë një kundërsulm të rrezikshëm nga krahu i majtë i tyre, ndërsa Stancu gjuan fort dhe sferën e ndal shtylla, me fat Shqipëria.
Dhjetë minutat e fundit të lojës janë tejet emocionuese për kuqezinjtë. Mavraj gjuan rrjetë të jashtme në minutën e 86, ndërsa dy minuta më vonë është Lila që gjuan nga brenda zonës, por mbi kuadratin e portës rumune. Shfaqen mjaft agresivë të besuarit e De Biazit në minutat përmbyllëse të takimit, ndërsa dëshirojnë të shënojnë një gol tjetër që iu rrit shansin e kualifikimit në 1/8-at. Në kohën shtesë është Canaj që shfrytëzon një asist në zonë, gjuan me kokë drejt portës, por Tatarushano shkon në kohë te topi.
[caption id="attachment_6712" align="alignleft" width="300"]
Stancu në minutën e 8 duke goditur drejtpërdrejt në kuadratin e Berishës[/caption]
Rumani - Shqipëri 1-0
Shënues: Sadiku 43'
Rumania: Tătăruşanu, Măţel, Hoban, Chiricheş, Alibec (Torje 57'), Stanciu, Prepeliţă (Sânmărtean 46'), Stancu, Popa (Andone 68'), Grigore, Săpunaru. Trajner: Anghel Iordanescu
Skema: 4-2-3-1
Shqipëria: Berisha, Hysaj, Ajeti, Mavraj, Agolli, Basha (Cana 83'), Abrashi, Memushaj, Lila, Lenjani (Roshi 77'), Sadiku (Bala 58'). Trajner: Xhani De Biazi
Skema: 4-5-1
Gjyqtarë: Pavel Královec, Roman Slyško, Tomáš Mokrusch (Çeki)
Kartonë të verdhë: Matel 54' , Sapunaru 85', Torje 90+2' / Basha 7', Memushaj 89', Hysaj 90+4'
Stadiumi: "Stade de Lyon"
Lexo gjithashtu
