Derbi Partizani – Tirana luhet mbrëmjen e sotme në orën 19:00, ndeshje e vlefshme për javën e 24-të të Superiores. Superdueli që vë përballë dy ekipet legjendare të futbollit shqiptar, mbërthen gjithë publikun në 90 minuta që garantojnë emocione dhe spektakël.
Skuadrat janë gati, por në fushë ka gjithmonë edhe një ‘ekip’ të tretë siç është trupa gjykuese. Sektori i Arbitrimit nuk ka emëruar ende arbitrat e sfidës të cilët pritet të bëhen publikë nga momenti në moment.
Dy më të mirët e Superiores, Enea Jorgji dhe Eldorjan Hamiti ishin të angazhuar dje në Conference League dhe në këtë mënyrë bilbili do t’i besohet tjetër kujt. Tre janë emrat kandidatë në listë: Juxhin Xhaja, Florian Lata dhe Emanuela Rusta.
I pari është favorite kryesor pasi është arbitri më me eksperiencë pas Jorgjit dhe Hamitit të cilët kanë gjykuar 2 derbet e para, ndaj sipas rregullit të pashkruar të FSHF-së që një arbitër nuk arbitron 2 derbi në sezon, atëherë pritet që Xhaja të jetë bilbili kryesor.
Opsioni B është Florian Lata, i cili sapo ka marrë stemën e FIFA-s, ndërsa emri i Emanuela Rustës sa vjen dhe fiton më shumë ‘pikë’. Dëshira për të shkruar historinë bën që momenti i Rustës për të gjykuar derbin të jetë gjithnjë e më pranë.
Mbetet të shihet cili do të jetë vendimi i FSHF-së.
Lexo gjithashtu
