Partizani po përgatitet për edicionin e ri në Kategorinë Superiore. Të kuqtë kanë zyrtarizuar afrimin e Ilir Dajës në pankinë, me besimin se do i kthejë te titulli kampion. Drejtori i përgjithshëm i kryeqytetasve, Olsi Rama ka folur në medie për shumë tema. Një nga çështjet më të nxehta është merkato, për të cilën ai natyrisht nuk zbulon gjithçka. Ajo që do vendosë pikat mbi ''I'' do jetë koha.
''Lojtarët? Sigurisht, deri sa janë këtu, të gjithë janë pjesë e Partizanit. Kemi disa mungesa për arsye objektive, Bardhin që e kemi lënë pushim se u aktivizua me ekipin B, Braun që ka një problem me gjurin dhe Solomon me Melon që janë jashtë vendit. Gjithë të tjerët janë këtu, që janë të konfirmuar nga sezoni i kaluar, plus Lukas Kradozo dhe Dionis Çikani që janë prurje të reja që vijnë nga huazimet, si dhe presim afrime të reja.Lilaj dhe Arapi?Emrat në fakt nuk janë të shumtë, gjithmonë gazetaria e ka këtë pjesën që duhet të spekulojë patjetër me emrat.
Deri tani ne kemi pritur trajnerin, jemi ulur me atë disa herë për të folur për strategjinë e lojës dhe pozitat kyçe. Është e vërtetë që një qendërmbrojtës dhe një mesfushor cilësor janë detyrat kryesore të merkatos këtë vit, po ashtu janë edhe dy mbrojtësit e krahut, të cilët patjetër duhet të vijnë në ekip që të integrohen dhe të japin kontributin e tyre. Telushi? Telushit i uroj suksese! Pata një bisedë shumë të çiltër dhe të hapur me atë dhe përfitoj nga rasti ta falënderoj për çfarë ka bërë te Partizani, sidomos gjatë vitit që dolëm kampion. Telushi është një nga ata lojtarë që unë e kam admiruar gjithmonë për shpirtin e garës dhe për mënyrën se si e ka interpretuar gjithmonë vullnetin dhe dëshirën e mirë që të fitojë. Është një person që e ka këtë pjesë të karakterit të tij. Unë gjithmonë kam ngulur këmbë dhe kam thënë se ndeshja nuk fitohet ditën kur luhet, por gjatë gjithë javës dhe ne në përgjithësi dhe një pjesë e grupit vjet kemi pritur pak më tepër në aspektin e mbështetjes morale dhe psikologjike.
Nuk është se fajësoj Telushin për këtë, por më tepër në aspektin e ndërrimit të faqes për të ndërruar edhe mënyrën e lojës dhe për të pasur një Partizan pak më të kristaltë në lojën e vet, Telushi nuk parashikohej që të kishte një rol qendror në këtë projekt. Për respektin që kam për Telushin bëra një bisedë shumë të hapur dhe vendosëm që rrugët të ndaheshin për arsye se edhe ai nuk e shikonte veten në rolin e një personi që vinte nga pankina.
Kështu që edhe ne do të përpiqemi të gjejmë zgjidhje të tjera për atë post. Partizani e nis sezonin me ndryshimin e stafit teknik, do ta thellojë ndryshimin edhe me emra të rinj në ekip? Sigurisht dhe përgjigjen për zhbllokimin e merkatos ne do ta marrim këtë fundjavë ose në fillim të javës tjetër. Çdo ekip ka nevojë për përforcime, madje edhe një skuadër fituese ka nevojë për rifreskime, se duhen stimuj të rinj dhe konkurrencë tjetër. Ne e dimë se ku janë detyrat tona dhe pozicionet që duhet të plotësojmë. Kështu që patjetër do të ketë përforcime. Titulli ?Vazhdoj ta përsëris, titulli kampion është kurorëzim i një sezoni ku ekipi duhet të tregojë paraqitje dinjitoze dhe lojë. Nëse ne e fillojmë sezonin duke kërkuar titullin, bëjmë një gabim shumë të madh se e shtrijmë këmbën më shumë sesa kemi hapin. Në radhë të parë objektiv kemi rritjen e nivelit të ekipit dhe gjetjen e një fizionomie të Partizanit me një lojë të menduar dhe studiuar dhe që t'u përshtatet sa më mirë lojtarëve që do të marrim.
Në qoftë se ne nuk realizojmë këtë, është e kotë të flasim për titull kampion, apo për Europë. Objektiv të qartë bashkë me stafin për këtë vit kemi që të realizojmë hapin e parë, i cili është formimi i ekipit dhe krijimi i një loje të mirëfilltë karakteristike të Partizanit. Nëse bëjmë këtë, detyra është të fitojmë çdo ndeshje, pastaj nëse fitojmë këto, rezultati do të shikohet në fund '' pohon ai.
Lexo gjithashtu
