Rraman Hallaçi ka folur para ndeshjes së Kukësit kundër Egnatias. Trajneri i verilindorëve vlerëson maksimalisht kundërshtarin, megjithatë shprehet besimplotë se nesër ekipi i tij do të marrë 3 pikë. Në prononcimin e dhënë për mediet tekniku i kuksianëve ka thënë:
“Është i rëndësishëm shumë edhe pushimi për futbollistët. Bëmë një pushim të shkurtër dhe u rikthyem te stërvitja. Na ka bërë mirë për të korigjuar ata gjëra që nuk i kemi bërë mirë. Kemi pasur vetëm një dëmtim. Mendoj se atmosfera ka qenë e mirë. Vlerësimi është maksimal për kundërshtarin duke qenë se kanë lojtarë cilësorë, sidomos në vijën e parë të sulmit. Jemi munduar gjatë ditëve që të mendojmë dhe daljet e tyre në videoanaliza. Të shohim sot dhe nesër se si duhet t’i frenojmë. Mendoj se skuadra i ka mundësitë për rezultat pozitiv siç është fitorja. Por, duhet të jemi të vëmendshëm në çdo moment sepse ata kanë vlera. Jemi gati për këtë ndeshje.
Stërvitja – Lojtarët duan të jenë afër publikut në Kukës. Ekipi duhet të vijë herë pas here këtu sepse klima është ndryshe. Mendoj se çdo gjë është mirë. E kemi bërë dhe në vazhdimësi. Do të ambientohemi më mirë. Herë pas here do ta bëjmë këtë gjë. Skuadra është e përqëndruar për të shkuar te rezultati që na intereson të gjithëve. Gjërat po shkojnë mirë me lojtarët. Jam i kënaqur dhe nga futbollistët e stolit. Mendoj se do t’ia dalim.
Renditja - Skuadrat janë mjaft të ngjeshura me njëra-tjetrën dhe është më se normale që do të jesh pak i ngarkuar, por kuptohet që futbollisti nis lojën, mundohet t’i harrojë. E rëndësishme është se po dalim nga vështirësitë. Skuadra është mësuar me presionin në supe. Duhet kujdes sepse Egnatia është skuadër që ka kualitet”.
Kukësi do të luajë nesër kundër Egnatias në orën 15:00 në "Kukës Arena".
Lexo gjithashtu
