Pas një paraqitje mbresëlënëse në Kampionatin Europian, vlera e përfaqësueses Shqiptare është rritur. Sipas “Transfermarket”, kuqezinjtë vlejnë plot 46.15 milionë euro.
Një rritje e konsiderueshme kjo, ku në startin e Euro 2016, Shqipëria vlerësohej 40,88 milionë euro, me Shqipërinë që pozicionohej e 22-ta në renditjen speciale të 24 skuadrave pjesëmarrëse në evenimentin kontinental, duke lënë pas vetëm Irlandën e Veriut dhe Hungarinë. Lojtari që kushton më tepër nga kuqezinjtë është Elseid Hysaj. Përpara Europianit, mbrojtësi i Napolit vlerësohej 9 milionë euro, ndërsa tashmë çmimi i tij ka shkruar në plot 12 milionë euro. Rritje ka edhe vlera e Abrashit, që tashmë kushton 2,5 milionë euro, ndërsa çmimi i Ledian Memushajt është dyfishuar, me mesfushorin vlonjat që vlerësohet 2 milionë euro në merkato. Rritje të çmimit të kartonit ka edhe për Mërgim Mavraj-n, 1,75 milionë euro, Arlind Ajetin që vlerësohet 1,5 milionë, Ermir Lenjanin 1,25 milionë dhe Sokol Cikalleshin 2,8 milionë euro.
