Java e shtatë e Superiores ka ulur siparin për t’i lënë vendin të nëntës. Ndeshje spektakolare dhe mjaft gola të prodhuar. Vlen të veçohen fitorja e Partizanit në transfertë si dhe barazimi 3-3 i Laçit kundër Tiranës në kryeqytet.
Si çdo javë, Newsport.al ka përzgjedhur më të mirët. Nga porta në sulm, të gjithë në një mënyrë ose tjetër kanë dhënë kontributin e tyre në arritjen e objektivave. Më poshtë njihuni me 11-shen më të mirë si dhe trajnerin fitues.
FORMACIONI I JAVËS:
Bekim Rexhepi – Portieri i Partizanit është spektakolar në Shkodër. Ai duket se bën një autokritikë për gabimet në derbi dhe në “Loro Boriçi” jep kontribut të madh në marrjen e 3 pikëve. Pret gola të sigurtë dhe në fund të sfidës merr përgëzimet e të gjithëve. Padyshim ndër më të mirët në fushën e blertë.
Edison Ndreca – Kukësi luajti me formacion 3-4-3, ndërsa anësori i linjës së majtë të verilindorëve shkëlqeu. I papërmbajtshëm dhe drithërues shpesh herë me goditjet e tij. Sulmon fort dhe arrin të kthehet në kohë për të mbrojtur portën të paprekur. Me Enkeleid Dobin, duket sikur është me tjetër marsh.
Adolf Selmani – Kastrioti fitoi kundër Teutës dhe i pakalueshëm ishte shtatlarti nga Fushë-Kruja. I vendosur mirë në prapavijë dhe gjithmonë inteligjent në ndërhyrjet e tij. Nuk lë hapësira dhe për portierin Sali, është siguri më vete prania e tij në mbrojtje. Ndaj durrsakëve i “nxin jetën” sulmuesve të Shkëmbit dhe pas 90 minutave del me 3 pikë nga fusha.
Tiago Ferreira – U afrua me shumë bujë te Kukësi dhe dalëngadalë ka nisur të marrë terren. Eksperienca mbi supe si dhe cilësitë e bëjnë atë të domosdoshëm për skuadrën verilindore. Arrin të shënojë golin e parë duke i dhënë më shumë qetësi ekipit kuksian. Një ndër më të mirët e Kukësit që ndaj Bylisit tregoi se është “kockë” e fortë në shtëpi.
Eneid Kodra – Emiliano Çela i ka besuar shumë në këtë sezon futbollistik, duke ia “hipotekuar” linjën e djathtë të mbrojtjes. Vrapon shumë, sa në mbrojtje ashtu edhe në sulm. Është i vendosur mirë dhe gjithmonë në kërkim të gjejtjes së lojtarëve më të fortë në zonën kundërshtare. Ndaj Teutës lufton dhe kroson shumë. Një vend në formacionin e javës e meriton.
Abaz Karakaçi – Mban shiritin e kapitenit në krahë dhe ndaj durrsakëve tregoi se e meriton atë. Çfarë grinte nga shkodrani që lufton me “gjak” që skuadra e Kastriotit të mos dalë pa pikë nga fusha. Shënoi një eurogol që çdo kush do e kishte zili në Superiore. Ndoshta golin më të mirë të javës.
Shqiprim Taipi – Vëllai i vogël këtë herë u paraqit më mirë se i madhi. Ky i fundit dha asist, ndërsa Shqiprimi shënoi një gol të bukur nga distanca. Vrapoi shumë për gjatë gjithë ndeshjes duke treguar se e meriton vendin e titullarit te verilindorët. Goli i parë në këtë sezon futbollistik për të që pritet të pasohet nga të tjerë.
Victor Da Silva – Braziliani duket se është basti i fituar i drejtuesve të Partizanit në merkaton e verës. Ndeshje pas ndeshje ka progres në performancën e tij. Në Shkodër shënoi dhe nuk festoi për respekt të aventurës së kaluar në Loro Boriçi. Barazoi rezultatin dhe ishte gjithmonë rrezik konstant për Vllazninë.
Mentor Mazrekaj – Dikur thonte nëpër studio: “Më jepni një top dhe më lini të luaj”. Te Laçi ka marrë përsipër rolin e liderit, ose më saktë i ka rënë gjithë pesha e kurbinasve. Ndaj Tiranës duket gjithmonë dyfish i karikuar kur luan me ta. Dy gola të shënuar dhe 1 pikë e marrë falë aftësive të anësorit të djathtë, një ndër më të mirët në pozicionin e tij në Shqipëri.
Redon Xhixha – Dikush duhet t’i vihet ta markojë këmba-këmbës. Në të kundërt golat e tij do të “vërshojnë lumë”. Ndaj Laçit shënon plot 3 herë duke qenë spektakolar në “Selman Stërmasi”. Shkëlqen gjatë gjithë ndeshjes dhe nëse mbrojtja bardheblu s’do kishte gabuar, Tirana do të kishte marrë 3 pikë në javën e shtatë të Superiores.
Xhuliano Skuka – Kërkon mirë hapësirat boshe dhe bën të markohet nga dy qendrat e Vllaznisë. Në një moment kur del në të djathtë, shfrytëzon mirë asistin e Rrapajt duke kalibruar të djathtën e tij. Goditje prej sulmuesi spektakolar, gol me vlerë 3 pikë. Derbi me Tiranën duket se është lënë pas dhe tashmë është koha për të bërë më të mirën e tij.
TRAJNER: GIOVANNI COLELLA
Sa shumë kritika për trajnerin italian që në Shkodër merr një fitore me mjaft vlera. Humbja në derbi lihet pas dhe përmbysja e rezultatit në “Loro Boriçi” tregon se ky Partizan po rritet dita-ditës. Provon një skemë të re në Shkodër që në fund rezulton efikase. Të kuqtë janë ndërtuar për titull dhe si të tillë duhet të sillen dhe në fushën e blertë. Colella i ka vendosur mirë, tashmë pritet të shihet se si do të jenë në vazhdim.
[caption id="attachment_662114" align="alignnone" width="475"]
Formacioni i javës[/caption]
Lexo gjithashtu
