Kategoria Superiore uli siparin për javën që lamë pas, ku sigurisht spikati derbi i kryeqytetit. Partizani arriti të fitonte me rezultatin 2-0 kundër bardhebluve. Jo vetëm derbi, por edhe sfidat e tjera të elitës prodhuan spektakël.
Sikurse në çdo javë, Newsport.al ka përzgjedhur 11-shen që shkëlqeu. Në një mënyrë tjetër ose tjetër, 11 futbollistë kanë lënë gjurmë në javën e 24-të të Superiores. Më poshtë njihuni me formacionin dhe trajnerin fitues.
FORMACIONI:
Visar BEKAJ – Një ndeshje derbi që pati gjithçka, veç golave nga ana e Tiranës. Edhe pse bardheblutë u mposhtën, “gardiani” i kryeqytetasve arriti të priste një penallti duke mbajtur skuadrën e tij në lojë. Megjithatë fati nuk qe në anën e tij duke pësuar dhe një gol më vonë për gabimin e Behiratche.
Edison NDRECA – Piston në linjën e majtë të mbrojtjes së Kukësit. I jashtëzakonshëm në sulmet dhe në markimet e tij. Gjithmonë pikë referuese për stafin teknik të verilindorëve. I gatshëm për të nxjerrë ekipin nga balta. Trajneri Rraman Hallaçi, veç cilësive, ka edhe eksperiencën e futbollistit.
Darko BULATOVIÇ – Vllaznia kishte shansin e artë të përfitonte nga derbi i kryeqytetit. Por, nuk mundi të shkonte më shumë se 1 barazim ndaj Teutës. Shkodranët bënë relativisht mirë. Megjithatë Bulatoviç ishte lojtari që shkëlqeu. Qendërmbrojtësi i kuqebluve ishte i pakalueshëm në prapavijë. Vendosej saktë dhe ndërtonte mirë.
Bruno TELUSHI – Çfarë grinte, çfarë loje nga ushtari i betuar i Partizanit. Do të ishte më i miri i sfidës nëse do të arrinte të shndërronte në gol penalltinë. Megjithatë 11-metërsha kanë humbur lojtarë të mëdhenj. Dje kishte marrë përsipër të ndërtonte dhe të mos lejonte sulmin bardheblu. E bëri më së miri duke i dhënë të drejtë Colellës për shiritin e kapitenit.
Andi HADROJ – U afrua nga Bylis si një lojtar zëvendësues. Që prej kohës së Arbnor Fejzullahit, Partizani nuk po gjente karar me linjën e djathtë të mbrojtjes. Duket se më në fund ka bërë bingo. Hadroj është njeriu i derbit. Ia bën makth jetën Përgjonit dhe autor i asistit të golit të parë. I jashtëzakonshëm.
Masanga MATONDO – Në fushë dje ishin dy numrat 6 më të mirë të Superiores. Nga njëri kamp Albano Aleksi, nga ana tjetër mesfushori i Partizanit. Matondo fitoi këtë duel personal me lojtarin e Tiranës. Nuk gaboi në asnjë aksion. Shkatërroi çdo nisëm të bardhebluve dhe shkëlqeu në ndërtimin e lojës. Në fund kërcënoi kundërshtarët dhe me një “predhë” nga distanca.
Sherif KALLAKU – Mesfushori i Teutës ka gjetur “rininë” e dytë me fanelën durrsake. Tashmë po shënon sistematikisht dhe këtë gjë e bëri edhe kundër Vllaznisë. Duket se ka marrë për dore ekipin e Teutës dhe me eksperiencën e tij, janë gati për të arritur objektivin.
Amir KAHRIMANOVIÇ – Është gjithmonë gati për t’i shërbyer skuadrës së Erzenit. Edhe në Ballsh merr përsipër të ekzekutojë një 11-metërsh, ku dozat e emocioneve ishin të mëdha. Është vetëm 23 vjeç dhe në mesfushën e shijakasve duket sikur ka një “jetë” që luan. Shënon dhe i jep 1 pikë ekipit të tij.
Redi KASA – Çfarë performance nga 22-vjeçari i rrogozhinasve. Shkëlqen dhe shënon kundër Kastriotit. I papërtueshëm për 90 minuta. Shpërblen besimin e trajnerit Tetova dhe tashmë duket se ka fituar vendin e titullarit. Shihet si e ardhmja e skuadrës së Egnatias dhe pritet vazhdimësi në performancat e tij.
Christian MBA – Nuk do ta dinte kurrë rëndësinë e një derbi shqiptar, nëse nuk do të ishte vetë pjesë e tij. Sulmuesi i Partizanit shkëlqeu dhe arriti të shënonte golin e parë me fanelën e kuqe. Nuk gaboi në rastin e parë që iu dha shtatlartit duke tundur me sup portën e Tiranës. Padyshim që meriton një vend në formacionin e javës.
Raphael DWAMENA – Bast i fituar i klubit të Egnatias dhe i menaxherit Arbi Laçi. Sulmuesi i rrogozhinasve po shkëlqen dhe duket se njeh jashtëzakonisht mirë portën kundërshtare. Dy gola njëri pas tjetrit me Kastriotin. Siguri më vete dhe cilësi e shtuar në futbollin shqiptar.
TRAJNERI GIOVANNI COLELLA:
Iu kërkua të vijonte drejtimin e Partizanit së paku edhe për derbin. Dha dorëheqjen pas Vllaznisë, por nuk iu pranua. Ndaj Tiranës do ta luante vetëm ashtu si ai dinte. Ia doli. Fitoi dhe triumfoi bindshëm. Trajneri fitues i derbit zgjidhet gjithmonë në formacionin e javës. Këtë herë e meriton italiani i të kuqve.
[caption id="attachment_683493" align="alignnone" width="479"]
Formacioni i javës[/caption]
Lexo gjithashtu
