Dje, u mbyll java e 16-të e Superligës me ndeshjen Teuta - Partizani përfunduar me rezultatin 1-1. Një javë me emocione dhe të papritura, ku vlen të veçohet barazimi pa gola në transfertë i Kastriotit kundër Vllaznisë pretendente. Skënderbeu ndalet në shtëpi nga Apolonia, ndërsa Laçi i jep leksion Tiranës në shtëpi.
Newsport.al ka përzgjedhur më të mirët e kësaj jave, nga porta ku flamurin e mban padyshim Isli Hidi e deri te sulmuesi Blerim Krasniqi, ai që i prishi festën e fitores Partizanit. Më poshtë njihuni me më të mirët dhe trajnerin fitues të javës së 16-të të elitës së futbollit shqiptar.
ISLI HIDI - Mban mbi supe plot 40 vite dhe falë eksperiencës së tij në katërkëndësh, skuadra e Kastriotit numëron plot 18 pikë në tabelën e klasifikimit. Në transfertën e Shkodrës i vuri "kyçin" portës së tij duke ia bërë të pamundur kryesuesve marrjen e fitores. Padyshim më i miri në këtë javë të elitës.
HEKTOR IDRIZAJ - Vrapoi pa pushim ndaj Teutës dhe e bëri të "tijin" linjën e djathtë të fushës. Arriti të fitonte çdo dyluftim me kundërshtarin dhe dha një kontribut të madh në marrjen e 1 pike në transfertë ndaj "Djemve të Detit". U rikthye në fushë pas një ndeshje pushim në derbi dhe shpërbleu besimin e dhënë të trajnerit Ilir Daja.
REALF ZHIVANAJ - Qendërmbrojtësi më i ri në Superligën shqiptare, i cili e nis për herë të parë si titullar me skuadrën e Kastriotit. Atëherë kur trajneri Ramadan Ndreu kishte nevojë më shumë se kurrë për shërbimet, ia shpërblen më së miri duke u bërë së bashku me Shkallën mur i vërtetë për sulmin shkodran.
MILOS STOJANOVIÇ - Bylis u mposht nga Kukësi, por qendërmbrojtësi i mallakastriotëve ishte në ditë të mirë. Arrin të markojë si duhet dhe jo vetëm kaq, por shtyn para duke rrezikuar disa herë verilindorët. Është ai që i jep avantazhin fillimisht skuadrës së tij me një gol të shënuar në hyrje të zonës kuksiane.
EMILIANO MUSTA - Vrapon pa pushim dhe lufton shumë në linjën e majtë të Laçit duke neutralizuar disa aksione të rrezikshme të Tiranës. Thuajse në çdo ndeshje titullar, ka arritur të fitojë besimin e trajnerit Shpëtim Duro. Eksperienca në kampionatin shqiptar i jep më shumë avantazh elbasanasit për të qenë ndër më të rëndësishmit e organikës kurbinase.
JASIR ASANI - Vijon të shkëlqejë te Partizani. U rikthye pas një dëmtimi që e mbajti jashtë për 3 javë e ka gjetur formën e tij më të mirë. Për çdo kundërshtar është rrezik absolut dhe ndaj Teutës tregoi cilësitë e tij. Shënoi në fillim të sfidës, gol që pati vlerën e 1 pikë për skuadrën e tij.
AGNALDO MORAES - Trajneri Ramadan Ndreu ka gjetur "çelësin" e suksesit në mesin e fushës. Braziliani që luan i avancuar është natyralizuar si lojtari që bën digën në ekipin krutan. Bën një lojë fantastike në Shkodër, thyen aksionet kundërshtare dhe merr përsipër të organizojë. Lidh mirë mbrojtjen me mesfushën duke qenë ndër më të mirët në atë sfidë për krutanët.
GJELBRIM TAIPI - U afrua me bujë te Kukësi, por ende nuk ka arritur të tregojë nivelin e tij optimal. Mesfushori i verilindorëve ndaj Bylisit shkëlqeu. Pasime të sakta, mjaft luftarak në mesfushë dhe një lidhje të mirë me Agim Ibraimin duke u shndërruar në rrezikun konstant të kundërshtarëve.
MENTOR MAZREKAJ - Askush nuk do ta kishte besuar në fillim të sezonit këtë performancë të jashtëzakonshme të fantazistit me skuadrën e Laçit. I jep liri skuadrës së tij në fushë sa herë që kap topin. Arrin të krijojë zona të lira për shokët e ekipit si dhe individualisht mrekullon me lëvizjet e tij në fushë. Për t'i vënë "qershinë mbi tortë" mendon përmes goditjeve të dënimit, nga e cila realizon një supergol ndaj Tiranës, duke i dhënë në këtë mënyrë 3 pikë të rëndësishme kurbinasve.
AGIM IBRAIMI - Njeriu i ndeshjes për Kukësin kundër Bylisit. Asist dhe gol nga lojtari i afruar me shumë bujë në merkaton e verës. Ekipi po kolaudohet dhe 31-vjeçari po tregon se është vërtetë vlerë e shtuar në futbollin shqiptar. 8 gola të shënuar nga ai në 16 javë, janë statistika të frikshme që tregojnë nivelin e këtij futbollisti.
BLERIM KRASNIQI - Edhe pse humb shumë raste ndaj Partizanit, është ai rreziku konstant për skuadrën e Ilir Dajës. Arrin të shënojë duke i dhënë 1 pikë ekipit të tij. Krijon volum të madh loje dhe falë lëvizjeve të shumta, "çakordon" prapavijën e kuqe duke krijuar disa momente të vështira në portën e Alban Hoxhës.
TRAJNERI I JAVËS - RAMADAN NDREU
Askush nuk e kishte menduar se Kastrioti do të dilte me pikë nga "Loro Boriçi" përballë një Vllaznie që ka surprizuar të madh e të vogël në këtë sezon futbollistik. Por, trajneri krutan arrin të vendosë mirë ekipin në fushë duke ia bërë të pamundur shënimin e golit kuqebluve të Brdariç. Mbyll mirë hapësirat e krijuara dhe në disa momente rrezikon seriozisht portën e Vllaznisë. 18 pikë në 16 javë, as në ëndrrat më të bukura të një tifozi nuk do të ishte parë ky Kastriot i ndërtuar këtë sezon nga Ramadan Ndreu.
Lexo gjithashtu
