Kategoria Superiore uli siparin për javën e 13-të të saj. Skuadra dhe lojtarë që spikatën janë përzgjedhur pikërisht nga Newsport.al për të qenë më të mirët. Nga porta e deri në sulm, në një javë që nuk munguan as golat e shumtë.
Padyshim që Erzeni dhe Egnatia janë dy nga ekipet me më shumë futbollistë për shkak të formës së treguar ndaj kundërshtarit që kishin përballë. Ndërsa trajneri i javës edhe këtë herë është Shpëtim Duro që po tregon se është “doktori” i munguar i ekipit rrogozhinas.
FORMACIONI I JAVËS:
Mario Dajsinani – Laçi arriti të fitonte në fushën e vështirë të Ballshit dhe padyshim një meritë kryesore ka “gardiani” i kurbinasve. Me trajnerin e ri Gentian Mezani skuadra u përgjigj në mënyrën e duhur, ndërsa ai ishte në formë. Me gjithë rastet e vazhdueshme të mallakastriotëve, Dajsinani ishte në “top formë” duke mbajtur të paprekur portën e tij.
Blerim Kotobelli – Teuta fitoi në transfertë kundër Kukësit, ndërsa Blerim Kotobelli zhvilloi një ndeshje të kënaqshme. Mbrojtësi i majtë i durrsakëve, falë eksperiencës dhe cilësive ishte rrezik konstant për kundërshtarët. Në prapavijë neutralizoi aksionet e kundërshtarit dhe në sulm shërbeu disa herë për sulmuesit.
Rudolf Turkaj – Laçi fitoi kundër Bylisit në kuadër të javës së 13-të të Superiores dhe një kontribut të veçantë ka edhe qendërmbrojtësi i njohur. Shtatlarti ishte i pakalueshëm në mbrojtje dhe me eksperiencën e tij ndihmoi bardhezinjtë të merrnin 3 pikë shumë të rëndësishme.
Marsel Ismajlgeci – Tirana e tij fitoi në një ndeshje plotësisht të dominuar nga bardheblutë kundër Kastriotit. Një vend në formacionin më të mirëve të javës e zë sepse luajti në krahun e djathtë, pozicion që nuk është i tij. E pikërisht si mbrojtës i kësaj linje arriti të markonte si duhet një rrezik konstant si Bedri Greca.
Fernando – Çfarë ndeshje spektakolare nga lojtari i Egnatias. Javë më parë Shpëtim Duro pati deklaruar se është ndër më të mirët e Superiores dhe koha po i jep të drejtë trajnerit kryeqytetas. Shënon dy gola, për nga realizimi të dy të rregullt. Por, një faull që nis nga mbrojtja e Egnatias detyron VAR-in ta anulojë.
Sherif Kallaku – “Ma sillni në skuadër dhe shihni unë ç’do të bëj me të”, këto kanë qenë fjalët e Orges Shehit për mesfushorin e njohur. Pas një përvojë jo shumë pozitive te Partizani, fantazisti kaloi te rivalët e përjetshëm. Me Shehin duket se ka rigjetur formën e munguar dhe veç lëvizjeve elegante në fushë, arriti edhe të shënojë.
Amir Kahrimanovic – Dramë në “Niko Dovana”. Gjithçka u duk e lehtë për Partizanin, por futbolli përfundon gjithëmonë atëherë kur bie bilbili. Mesfushori i Erzenit ia bëri “jetën të vështirë” të kuqve pikërisht atëherë kur u mendua se gjithçka kishte mbaruar. Në fundin e një ndeshje plot emocione, merr përsipër të godasë një penallti që do t’i jepte fundin takimit. Dhe ia doli ta shndërronte në gol. Fantastik!
Donald Mëllugja – Te Partizani e larguan si të padobishëm, por te Egnatia tregoi se stafi teknik i të kuqve ka gabuar. Me Shpëtim Duron ka rigjetur formën e para dy sezoneve te Bylis. Shkatërron dhe ndërton si duhet aksionet e Egnatias duke qenë në sinkron me fazën ofensive. Paraqitje pozitive ndaj Vllaznisë ku i siguron një vend në formacionin e më të mirëve.
Lorenco Vila – Karriera e tij ka qenë me shumë ulje ngritje, por cilësitë e këtij futbollisti janë të padiskutueshme. Është pikë referimi për Teutën, skuadër që me sa duket ka zgjedhur t’i jetë në besnik. Arrin të shënojë kundër Kukësit, gol që ka vlerën e 3 pikëve. Çdo javë titullar absolut dhe mjafton një shkëndijë e vogël e ekipit, që ai të jetë më i miri në fushë.
Tedi Cara – Partizani i tij humbi 2 pikë në një ndeshje që u duk e përfunduar prej minutës së 60-të. Por, Erzeni tregoi edhe një herë se futbolli luhet 90 minuta duke arritur të barazojë në minutat e fundit. Megjithatë sulmuesi kavajas bëri një paraqitje spektakolare duke e kurorëzuar dhe me një supergol që padyshim do të vlerësohet në fundin e sezonit, si një ndër më të bukurit e edicionit.
Vasil Shkurtaj – Sa shumë peripeci për sulmuesin e njohur të rikthehet edhe një herë në formën që të gjithë e mbajnë mend te Kukësi. Me Laçin dhe Mezanin e nisi si titullar duke ia shpërblyer besimin me golin e shënuar. Arriti të realizonte dhe i dha 3 pikë mjaft të rëndësishme kurbinasve. Nëse do të vijojë të ketë progres, pa frikë do të konsiderohet si “blerja” e Laçit në merkato.
TRAJNER SHPËTIM DURO:
Asnjë skuadër nuk mund të udhëtojë drejt Shkodrës si favorit. Por, këtë e bën vetëm Egnatia e Shpëtim Duros. Trajneri kryeqytetas pati deklaruar se do të merrte pikë ndaj Vllaznisë dhe në fakt ia doli. Arriti të zhvillonte një 90 minutësh fantastik duke zbehur plotësisht lojën e ekipit kuqeblu. 3 pikë të rëndësishme që tashmë e kanë ngjitur Egnatian në vendin e tretë të Superiores. Çfarë pune fantastike nga trajneri i njohur.
[caption id="attachment_671453" align="alignnone" width="477"]
Formacioni i javës 13[/caption]
Lexo gjithashtu
