Java e 11-të e Superiores uli siparin ditën e djeshme me sfidat që dhanë verdiktet e tyre. Pak gola të shënuar, megjithatë renditja e elitës ka ndryshuar. Tirana kryeson Superioren me 21 pikë, 2 më shumë se Partizani ndjekës që zbret në vend të dytë.
Si në çdo javë, Newsport.al ka zgjedhur 11 lojtarët më të mirë që shkëlqyen në këtë javë që lamë pas. Nga porta në sulm, në një mënyrë ose tjetër, ata dhanë kontributin e tyre në arritjen e objektivave. Gjithashtu edhe trajneri fitues që këtë javë trofeu simbolik i Newsport shkon për “timonierin” e Laçit.
FORMACIONI I JAVËS
Pano Qirko – Teuta barazoi në transfertë kundër Bylisit, por çfarë ndeshje zhvilloi portieri vlonjat. Ishte pikërisht ai heroi i pikës së marrë në Ballsh teksa arriti të mbante të praprekur portën durrsake. I përqëndruar 90 minuta, Qirko dha kontributin e vet për të marrë 1 pikë në fushën e vështirë të mallakastriotëve.
Esin Hakaj – Është gjithmonë aty kur Vllaznia humb apo fiton. Fjalë pak e punë shumë. Shkodrani që i duhet këtyre ngjyrave për të arritur objektivave sezonalë. Në Kukës realizon një perlë që ka vlerën e 3 pikëve. Padyshim meriton dhe zë një vend kryesor në formacionin e javës të Neësport.al. Jo më kot është një nga të ftuarit në Kombëtare.
Rudolf Turkaj – Laçi fiton tjetër ndeshje në Superiore dhe qendërmbrojtësi i kurbinasve po kalon momente fantastike në karrierën e tij. Vendoset saktë në prapavijë dhe neutralizon çdo aksion të nisur nga Partizani. Xhulio Skuka është hije falë mbulimit si duhet të shtatlartit të bardhezinjve. 3 pikë në shtëpi dhe menjëherë drejt kuqezinjve për miqësoren me Katarin.
Stivian Janku – Bylis nuk arriti të merrte më shumë se 1 pikë kundër Teutës, ku heroi i durrsakëve ishte portieri. Qendërmbrojtësi i Bylisit ka fituar eksperiencë në kampionatin shqiptar dhe për trajnerin Arjan Bellai është shndërruar në pikë referimi. Jo vetëm mbron, por pikërisht çdo aksion sulmues nis nga këmbët e tij. Lojtar i fituar nga mallakastriotët.
Kristijan Tozhevski – Mbrojtësi i Tiranës bën një paraqitje pozitive kundër Egnatias. Në linjën e djathtë të fushës fiton shpesh duelet me kundërshtarët dhe është ai njeriu asist për Patrick që realizon ndaj rrogozhionasve. Prej kohësh në hije, por javën e fundit mbrojtësi tregoi progres në lojën e tij.
Serxho Ujka – “E dua në fushë; Më mungon ai lojtar”, këto ishin fjalët e trajnerit Vukiçeviç para disa javësh dhe koha i dha të drejtë. Javë pas jave mesfushori i bardhezinjve po shkëlqen dhe ndaj Partizanit ishte ai heroi i takimit. Sajoi një gol nga hiçi duke goditur bukur nga distanca dhe nuk pushoi së vrapuari për 90 minuta.
Rejan Alivoda – Çfarë ndeshje e mrekullueshme nga 19 vjeçari i Vllaznisë. Talenti i shkodranëve duket sikur ka një jetë që luan futboll në Kukës. I plotësuar më së miri nga Lorik Boshnjaku. Eksperienca e këtij të fundit bëri që çdo aksion kuksian të thyhej nga ai. Megjithatë Alivoda në pozicionin e tij natyral tregoi vlerat duke goditur jo pak herë portën verilindore. Fitoi shumë dyluftime në rikuperimin e topave. Një 19-vjeçar që mbushte me oksigjen skuadrën shkodrane.
Sebastian Spahiu – Mesfushori i Laçit zhvillon minuta spektakolare kundër Partizanit. Bashkë me Ujkën në mesin e fushën fitojnë çdo dyluftim dhe ndërtojnë mirë aksionet sulmuese. Të ndihmuar nga fantazia e Mazrekajt, gjithçka bëhet më e lehtë për dy lojtarët që ndaj të kuqve bëjnë një ndeshje të mirë. Erdhi pa shumë bujë në merkato te kurbinasit, por është padyshim një nga lojtarët më të rëndësishëm të organikës kurbinase.
Patrick Nonato – Erzeni merr një 1 pikë tjetër në Superiore dhe sulmuesi brazilian po kalon një formë të mrekullueshme. Shtatlarti realizon kundër Kastriotit dhe është rrezik konstant për mbrojtjen krutane. I fortë në dyluftimet në ajër, por i saktë dhe në lojën me këmbë. Javë pas jave po shënon gola me vlerë.
Patrick de Souza – U afrua te Tirana në merkaton e verës, por në fushë ka treguar cilësi të mira. Arrin të shënojë kundër Egnatias, një gol me mjaft vlera. 3 pikë falë 24-vjeçarit që e ngjit Tiranën tanimë në vendin e parë të Superiores. Ka fituar besimin e stafit teknik të bardhebluve dhe në çdo ndeshje e nis nga minuta e parë.
Bedri Greca – “Mund të kisha bërë dhe më mirë”, u shpreh sulmuesi i Kastriotit pas ndeshjes. Edhe pse humbi një rast të artë për t’i dhënë 3 pikë krutanëve, sulmuesi kryeqytetas tregon vendosmëri për të marrë pikë ndaj ekipit të Çelës. Realizon një gol me kokë dhe nuk lodhet për asnjë moment së vrapuari.
TRAJNERI DEJAN VUKIÇEVIÇ
Nëse do ishte përmendur para pak javësh me siguri të gjithë do të habiteshin pse presidenti Pashk Laska nuk e shkarkon. Por, koha i dha të drejtë. Me rikthimin e lojtarëve të dëmtuar, trajneri kurbinas ka ndërtuar një ekip simpatik që po i hap punë çdo kundërshtari. Këtë javë, “preja” e tyre ishte Partizani kryesues që detyrohet të zbresë në të dytin prej humbjes me Laçin. Puna e malazezit ka nisur të dalë në pah. Nëse kurbinasit vijojnë me të tillë ritëm, padyshim do të jenë si në çdo sezon skuadër pretendente për vendet e para dhe Kupat e Europës.
[caption id="attachment_665895" align="alignnone" width="477"]
Formacion i javës 11 të Superiores[/caption]
Lexo gjithashtu
