Ndeshjet e javës së 15-të, të Superligës, kanë përfunduar dhe kanë dhuruar spektakël e emocione në fushën e lojës. Ka qenë një javë e veçantë, pasi është luajtur derbi i kryeqytetit mes Partizanit dhe Tiranës, që ka "mbërthyer" gjithë opinionin sportiv.
Humbja e Skënderbeut në shtëpi ndaj Teutës, pati një impakt të madh, pasi është zmadhuar distanca mes Partizanit dhe Skënderbeut, në katër pikë.
Newsport.al ka përzgjedhur formacionin e javës duke veçuar futbollistët që spikatën dhe trajnerin fitues. Më poshtë njihuni me secilin prej tyre.
Portier:
Isli Hidi: Teuta fitoi mbrëmjen e djeshme në Korçë ndaj Skënderbeut me rezultatin e ngushtë 0-1. Mirëpo një meritë kryesore për këtë sukses e ka patur edhe portieri Isli Hidi, i cili në disa raste ka qenë shumë deçiziv me pritjet e tij. Madje ai ka pritur dhe penalltinë e Fidan Alitit. Në fakt shtatlarti, jo vetëm dje mbrëma, por gjatë gjithë këtij sezoni ka qenë një ndër pikat kyçe të suksesit të Teutës.
Mbrojtësat:
Tefik Osmani: Osmani është rikthyer aty ku sezonin e fundit u shpall kampion. Shtatlarti këtë sezon është pjesë e Teutës dhe deri më tani padyshim që është një ndër shtyllat e skuadrës së drejtuar, nga Bledi Shkëmbi. Për të marrë këtë 3 pikësh, Teutës iu desh që për më shumë se 45 minuta ta mbronte rezultatin me 10 lojtarë. Për detyrën që kishte përsipër, Osmani e ka zbatuar shumë mirë, duke qenë shumë i qendrueshëm në mbrojtje, madje edhe shumë i ftohtë atëherë kur situata tensionohej.
Sodiq Attanda: Partizani i tij fitoi dhe ka bërë një ndeshje të shkëlqyer në këte derbi. Ka qenë i pakalueshëm dhe i pagabueshëm në repartin e mbrojtjes duke qenë me meritë në këtë formacion.
William Corderio: Braziliani është një nga pikat kyçe të këtij Kukësi. Këtë e vërtetoi dhe në transfertën e vështirë, me Luftëtarin. Një "tren" në krahun e djathtë të fushës, braziliani po tregon që është një shkallë më lartë se shokët e ekipit.
Claudio Bonani: Kamza ditën e sotme arriti të merrte një pikë me shumë vlera në transfertën e Laçit, aty ku shumë ekipe të mëdha 'bien'. Mbrojtësi 21 vjeçar, Bonani ka qenë një lojtar që në këtë takim e ka bërë me shumë përpikmëri rolin e tij në krahë, duke mos lejuar hapësira për sulmin e kurbinasve.
Mesfushorë:
Valon Et'hemi: Ditën e djeshme Kukësi e ka gjetur rrjetën vetëm ne minutën e 88-të. Aurori i Golit ishte pikërisht Et'hemi, që e ndihmoi ekipin e tij të merrte këtë triumf, duke e mbajtur kështu pranë kreut të renditjes. Shumë i shpejtë dhe 'luftarak' në krah, duke i hapur shumë probleme mbrojtjes së Luftëtarit.
Sherif Kallaku: Superliga duket se po fiton një mesfushor të ri. Kësaj radhe bëhet fjalë për Sherif Kallakun, i cili në Korçë për aq minuta sa luajti ka bërë një ndeshje të përkryer. Volum loje në repartin e mesfushës, elegant me topin dhe i saktë me pasimet. Madje në fraksionin e parë pati një rast shumë të mirë për të dërguar topin në rrjetë, por në fund të fundit kjo ndoshta është gjëja e fundit që Shkëmbi i kërkon të bëjë, pasi ndërtimi i aksioneve dhe krijimi i lojës është më i rëndësishëm në rolin e tij.
Bruno Telushi: Telushi është një nga lojtarët më potent që ka mesfusha e Superligës, jo vetëm ajo e Partizanit. Këtë sezon ka shënuar 4 gola, që do të thotë se ai ka edhe një 'nuhatje' të mirë për golin. Në derbi ishte deçiziv, sepse e ndihmoi shumë skuadrën e tij, duke i dhënë më shumë 'frymëmarrje' në qarkullim.
Sulmues:
Rubin Hebaj: Deri në momentin përpara derbit nuk kishte shënuar asnjë gol në Superligë. Mbrëmjen e së premtes aktivizohet më pak se 45-minuta dhe shënon dy gola. Njeriu i ndeshjes padyshim, sepse i dha fitoren të kuqve dhe për më tepër që, tashmë kanë 34 pikë në krye të klasifikimit.
Camara: Teuta renditet e treta me 28 pikë. Një 3 pikësh e ka marrë në mënyrë spektakolare mbrëmjen e djeshme ndaj Skënderbeut. Rezultati ka përfunduar 0-1 dhe njeriu që e dërgoi topin në rrjetë mban emrin e tij.
Grent Halili: Në ndeshjen e derbit, Ardian Mema i ka besuar që nga minuta e parë dhe lojtari e ka shpërblyer. Ka shënuar një gol, që mund të përkthehej në fitore, nëse rezultati nuk do të ishte përmbysur.
Trajner:
Skënder Gega: Padyshim që nuk mund të ishte dikush tjetër, trajneri më i mirë i kësaj jave, përveçse Skënder Gegës. Motivoi ekipin, bëri zgjedhjet e duhura në fushën e lojës, madje bëri ndërrimin që solli fitoren, duke futur Hebajin në fushë. Rreshtimi i ekipit ishte fantastik, leximi i kundërshtarit ishte perfekt dhe meriton vetëm fjalë të mira, për derbin e dytë të fituar.
Lexo gjithashtu
