Filip Najdovski rinovoi dje për dy vite me skuadrën e Tiranës. Një nga lojtarët më të rëndësishëm të organikës bardheblu ka folur për këtë zhvillim të ri në karrierën e tij.
Në një prononcim të dhënë për infosport.mk, shtatlarti ka treguar se fillimisht kanë qenë larg marrëveshjes. Por, pas negociatash të shumta më në fund është gjetur gjuha e përbashkët që ai të vijojë karrierën me kampionët e Shqipërisë.
“Edhe pse ishim larg marrëveshjes së re, në momentin e fundit ata lëshuan pe, duke më plotësuar kërkesat, pas të cilave firmosa kontratë dy vjeçare. Të shpresojmë në një verë më të gjatë. Kemi një skuadër të shkëlqyer, prandaj shohim shansin tonë në Ligën e Konferencës. Me pak fat, pse jo mos ti arrijmë grupet”, është shprehur Najdovski.
29-vjeçari u transferua te Tirana në merkaton e verës së vitit 2020. Paraqitjet pozitive bënë që të fitonte menjëherë vendin e titullarit, por edhe zemrën e tifozëve. Pas një edicioni spektakolar, Tirana arriti këtë vit të fitonte edhe titullin kampion ku padyshim një kontribut të madh ka dhënë edhe Najdovski.
Lexo gjithashtu
