Vllaznia po zhvillon përgatitjet për javën e 22 të Kategorisë Superiore. Të besuarit e trajnerit Mirsad Jonuz do të udhëtojnë drejt Durrësit, aty ku do të përballen me Teutën të diel në orën 17:00. Shkodranët vuajnë mungesën e sigurt të Ndriçim Shtubinës, që ka plotësuar numrin 4 të kartonave të verdhë.
Veç mungesës së sulmuesit, trajnerin Mirsad Jonuz e shqetëson gjendja e mbrojtësit Renato Malota; që vuan ende dëmtimin e marrë në ndeshjen me Tiranën. Shtatëlarti u detyrua të braktiste ndeshjen e javës së shkuar, duke qenë në dyshim për transfertën e Durrësit. Tej lajmeve negative, shkodranët kanë arsye të ndihen “ngrohtë” pasi përpara transfertës në Kupë me Flamurtarin, janë shpërndarë edhe pagat për stafin dhe futbollistët.