Trajneri i Tiranës, Orges Shehi ka folur për ndeshjen kualifikuese të Champions League. Bardheblutë luajnë në turin e parë me Dudelange (6 korrik), kampionen e Luksemburgut. Për teknikun bardheblu lojtarët duket të jenë më kembë në tokë, duke mos e cilësuar si të kaluar këtë duel.
Për Fair Play, Shehi ka thënë se edhe në medie u fol se ishte një kundërshtar i lehtë, teksa për të në këtë fazë nuk ka më ekipe të kalueshme vetëm në letër.
“Edhe në kronikën që pashë, por edhe pas shortit, në çdo intervistë apo në çdo shkrim vazhdohet të flitet: 'Fat, fat, fat'. Ne jemi me fat vetëm sepse në vazon ku ishin ndarë 5 kundërshtarë na ra më e dobëta. Pra më e dobëta e gjithë atyre kundërshtarëve që ishin të fortë. Mos të harrojmë që është kundërshtar kampion. Në Champions League nuk ka skuadra të dobëta. Ne kurrsesi nuk duhet të nisemi më ketë ide që Luksemburgu s’ka futboll.
Mos të harrojmë që e ka koeficientin 8 dhe ne nisemi nga koeficienti 2.7. Kurrsesi nuk mund të themi që ata janë më të avantazhuar se ne, por nuk mund të themi që ne duhet të kalojmë ne eufori dhe të mendojmë kualifikimin në turin e dytë pa kaluar të parin. Këtë në mënyrë kategorike skuadra e ka të qartë.
Aq eksperiencë sa kam unë në këtë kompeticion, do mundohem t’ia transmetoj lojtarëve që në këtë kompeticion del edhe për shkak të detajeve. Kur luan me skuadra kampione, kur të humbet pak përqendrimi, vlersimi, kur nuk je i vëmendshëm, humbet ndeshjen. Del nga kompeticioni dhe pastaj thua: “Si dola unë“?! Ky është thelbi që po mundohemi të punojmë. Edhe nëse na binte shorti me skuadra të forta me këtë mentalitet do hynim. Në futboll nuk ka favorit", tha Orges Shehi.
Lexo gjithashtu
