Kreshnik Cjapi do të jetë gjyqtar kryesor për derbin e kryeqytetit. Newsport.al ka mësuar se arbitri i kolegjiumit të Fierit ka marrë përsipër këtë detyrë të vështirë për të vendosur drejtësi në ndeshjen Tirana – Partizani.
Edhe pse në pole-position kanë qenë disa gjyqtarë, Sektori i Gjykimit pranë Federatës Shqiptare të Futbollit ia ka lënë fatit në dorë duke hedhur një short.
Goglat kanë përcaktuar si arbitër pikërisht Cjapin që në këtë sezon futbollistik ka qenë një nga më pak të kritikuarit. Sakaq ndihmës të tij janë caktuar Rejdi Avdo dhe Denis Rexha. Ndeshja Tirana – Partizani është programuar të zhvillohet në orën 18:30 në stadiumin “Air Albania”.
Duhet evidentuar fakti se është mbajtur shumë sekret emri i gjyqtarit të kësaj sfide, në mënyrë që të mos krijohen polemika në kampet përkatëse. Megjithatë këtë herë e gjithë pesha kryesore do të rëndojë mbi Kreshnik Cjapin, që ka treguar në ndeshje të veçanta se di të mbajë presionin e sfidës, por edhe cilësitë e tij në arbitrim. /Newsport.al/
Lexo gjithashtu
