Ekskluzive/ Projektohet pritja madhështore që do t’i rezervohet Kombëtares nesër në Tiranë, zbuloni detajet e organizimit

Takimi mes Turqisë dhe Çekisë vendosi shumë mbi shanset për kualifikim të Shqipërisë në fazën e 1/8-ave në Europian. Shanset sot janë të zbehura, ndërsa 99% jemi jashtë këtij kompeticioni me kaq rëndësi për Shqipërinë dhe shqiptarët, të cilët po jetojnë si në ëndërr, duke parë Kombëtaren e tyre në majat e futbollit.

Vetëm një mrekulli mund të na mbajë në garë dhe që ne të shpresojmë më tej që këta djem që po na bëjnë krenarë prej dy vitesh radhazi, ta bëjnë edhe në këto ditë të mbetura të këtij kompeticioni, duke shkuar në fazën e 1/8-ave. Megjithatë, të gjithë jemi krenarë për atë që lojtarët dhe tifozët kanë dhuruar në rrugët e stadiumet ku ka luajtur Shqipëria. Ambasadorët më të mirë të kombit tonë, të cilët kanë treguar se vlejmë më shumë dhe se kemi ndryshuar një faqe të historisë që për 25 vitet e demokracisë jemi treguar me gisht për çështje negative. Tashmë ka ardhur ora të krenohemi!

Por, edhe nëse eleminohemi, ata djem që na bënë krenarë në natën e Aveiros, Beogradit, Elbasanit, Yerevanit, Lensit, Marsejës e Lyonit meritojnë një pritje madhështore, ashtu siç i kemi mbështetur për vite me radhë, por këtë herë t’i mbledhim vitet bashkë dhe t’i bëjmë atë ata aq krenarë sa na kanë bërë këto ditë.

Qeveria shqiptare, Digitalb dhe Bashkia Tiranë kanë projektuar këtë pritje që ne duhet ta kemi për detyrë t’ua bëjmë këtyre djemve dhe stafit të Kombëtares.

Ja plani që do të zbatojnë tre organizuesit e këtij eventi:

• Pritja do të nisë të bëhet në Rinas, ku një autobus i hapur do të presë kuqezinjtë, ashtu si të ishte ekip kampion.
• Do të bëhet bllokimi i rrugëve nga Aeroporti i Rinasit deri në sheshin “Nënë Tereza”
• Dekor madhështor nga organizuesit nga aeroporti deri në Tiranë
• Do të ketë njerëz rrugëve që do të dalin në mbështetje të kuqezinjve
• Do të jepen çmime dhe vlerësimë për stafin dhe lojtarët kuqezinj nga drejtues të shtetit tonë.

Pritja do të bëhet në “Tirana Fan Zone”, sipas burimeve pranë “newsport.al”, bëhet me dije se do të jetë pritje madhështore po aq sa ajo e Papës që iu bë më 21 shtator të vitit 2014.