Skënderbeu nuk po kalon momentet më të mira në kampionatin shqiptar dhe tashmë ky është fakt. Skuadra e Migen Memellit duket se do ta ketë të vështirë rikthimin në Superiore pas një investimi të jashtëzakonshëm te Dinamo dhe Flamurtari.
Prej disa ditësh bardhekuqtë duhet të bëjnë pa shërbimet e kapitenit Vangjel Zguro. Mbrojtësi i majtë ka pësuar një dëmtim që e ka lënë jashtë. Megjithatë në media dhe në rrjetet sociale është aluduar se kjo s’është e vërtetë.
Një përplasje me trajnerin Migen Memelli e ka përjashtuar atë nga skuadra. Por, në një intervistë të dhënë për Newsport.al, ai ka treguar se asgjë s’është e vërtetë. Një problem në kavilje e ka detyruar të qëndrojë jashtë fushës.
Zguro analizon dhe këtë sezon të Kategorisë së Parë, ku e sheh të vështirë, por jo të pamundur rikthimin në elitë. Në fund e mbyll duke deklaruar se do të rishikojë pozicionin e tij te Skënderbeu nëse gjërat do të vijojnë të jenë njësoj.
- Një kapiten që duket se i mungon shumë Skënderbeut. Vangjel çfarë po ndodh me ju?
E vërteta është se jam jashtë fushe për shkak të problemeve fizike. Kam kaviljen e dëmtuar.
- Çfarë iu kanë thënë mjekët, kur do të riktheheni në fushë?
Do të më duhet një periudhë 3 javore rikuperimi. Më pas do të jem i gatshëm për të kontribuar për Skënderbeun.
- Në media të ndryshme dhe në rrjete sociale është aluduar se jeni përplasur me trajnerin Memelli. Si qëndron e vërteta?
Unë s’kam punë me Memellin. Janë lajme koti këto. Mund ta cilësoj si fjalë kafenesh.
- Skënderbeu nuk është në nivelin që pritej. Sa besoni te objektivi “Superiore”?
E vërtetë që nuk jemi aty ku duhet. Po me pak gjëra që mendoj se duhen ndryshuar, sa jemi në kohë, Skënderbeu kap Superligën. Këtë e them me bindje.
- Kur thua pak gjëra, për çfarë e ke fjalën?
Në kuptimin që gjithësecili të bëjë më shumë për të kapur ritmin sepse koha ikën e nuk pret.
- Si është marrëdhënia juaj me presidentin Takaj?
Unë personalisht kam suportin e tij gjithmonë. Shpresoj që t’ia shpërblejmë këtë sezon me ngjitjen në Superligë.
- Por, me këtë Dinamo dhe Flamurtar në superformë duket e vështirë...
Me thënë të drejtën është e vështirë, por jo e pamundur duke parë ekipin që ne kemi. Por duhet thënë se mungesa ime ka ndikuar në këto dy ndeshje.
- Merkato e janarit po afron. Referuar eksperiencës tënde, cilin lojtar do t’i sugjeronit stafit teknik?
Këto janë gjëra që i di klubi. S’mund të them gjë për këtë pjesë.
- Në aspektin personal, a do t’iu shohim sërish në Superiore?
Personalisht kam refuzuar 4 oferta Superlige. I kisha dhënë fjalën presidentit që nëse do të vij në Shqipëri, do të jem sërish pjesë e Korçcës. Dhe kështu ndodhi. Pasi nuk më doli asnjë opsion në Amerikë për futboll, vendosa ta mbaja fjalën. Dhe presidentët e tjerë që më kanë kërkuar, më kanë mirëkuptuar.
- A mund të ketë një lëvizje tuajën në janar?
Të shoh si do shkojë. Mendoj 50 përqind me 50 përqind pasi mendoj se sakrifikova shumë duke ardhur në Kategorinë e Parë.
- Pra një ofertë e re nga Superliga mund t’iu largojë nga Korça?
Ofertat i kam pasur nga fillimi i sezonit dhe i kam akoma në Superligë. Por, për momentin jam i fokusuar vetëm te ekipi i Skënderbeut. Varet shumë si do shkojnë këto javë deri në dhjetor. Ka të bëjë shumë kjo gjë për mua. / Retin TOKA/
Lexo gjithashtu
