Merkatoja e janarit është një çështje mjaft e nxehtë te Tirana, me bardheblutë që janë ekipi më i “zhurmshëm” deri tani. Largimet e Zhivanaj, Hussein, Bytyçi, Kallaku, Limaj, Xhixha dhe Ismajlgeci, u pasuan me afrimet e Regi Lushkja dhe Kristal Abazaj. Mirëpo, kampionët në fuqi nuk duan të ndalen këtu, siç ka paralajmëruar edhe drejtori Osmani që do të ketë edhe dy apo tre afrime të tjera.
Burime të besueshmë pranë klubit bëjnë me dije për Newsport.al se bardheblutë kanë hedhur sytë nga Rimal Haxhiu, i cili ndërpreu huazimin te Kukësi. Aktualisht lojtari është kthyer te Apolonia që zotëron kartonin e tij dhe po pret për ofertat e duhura.
23-vjeçari është nga ata lojtarë që trajnerët “dashurojnë” pasi aftësitë e tij bëjnë që të luajë në shumë pozita të ndryshme. Me Kukësin ka luajtur herë si mbrojtës i djathtë, herë si sulmues ndërsa vjet me Dinamon luajti edhe si sulmues i majtë.
Trajneri Orges Shehi sheh tek ai një konkurent të fortë për Toshevskin, Florent Hasanin dhe Kristal Abazajn. Palët nuk kanë arritur akoma marrëveshjen me lojtarin që është nën kontratë me fierakët.
Lexo gjithashtu
