Me emrin e tij u duk fiks si një lojë “kuka-fshehti”. Herë te Partizani e herë te Tirana. Mediat “turfullonin”, ndërsa Regi Lushkja me qetësinë dhe saktësinë që e karakterizon në fushë, kishte zgjedhur të ardhmen e tij.
Superiorja, një arenë e sprovuar për mesfushorin, pa frikë një ndër më të mirët e kampionatit shqiptar. Tanimë është zyrtarisht bardheblu, ku dashur pa dashur ka veshur stofin e kampionit.
Kjo është një aventurë e re për kavajasin, që në një intervistë enkas për Newsport.al, tregon se si skuadra më e titulluar në Shqipëri arriti ta bindte.
“Një ndjenjë e brendshme...”, thotë ai ndër të tjera duke theksuar lidhjen me fanelën bardheblu që duket se ka ardhur vetiu. E nis menjëherë në sulm dhe në fund premton për tifozët kryeqytetas se së bashku do të shkojnë larg.
- Ktheheni në Shqipëri te Tirana. Cilat janë ndjesitë e para si bardheblu?
Realisht më kanë pritur shumë mirë dhe mjaft ngrohtë në ambientin bardheblu. Jam ndjerë shumë i vlerësuar nga të gjithë në ekip, që nga presidenti, stafi, trajneri dhe bashkëlojtarët. Kjo më ka bërë të ndihem shumë mirë dhe i lumtur për këtë zgjedhje.
- Aventura në Moldavi përfundoi shpejt. Çfarë nuk shkoi?
Në fillim gjërat shkuan shumë mirë. Kam pasur marrëdhënie të shkëlqyer me lojtarët dhe stafin teknik të ekipit. Gjithashtu edhe me trajnerin që ka pasur mjaft vlerësim për mua si lojtar. Por, që gjërat më tepër nuk shkuan siç duhet me disa nga drejtuesit e klubit, që filloi më pas krisja e marrëdhënies. Edhe që në fund mendova që të largohesha ishte gjëja e duhur për mua.
- Një derbi mes Tiranës dhe Partizanit. Pse zgjodhët bardheblutë?
Atëherë janë dy nga ekipet më të mira në Shqipëri. Kishte interesim nga të dyja palët. Por, që këmbëngulja e presidentit dhe e ekipit të Tiranës, më bëri që të bindem për të zgjedhur bardheblutë. Gjithashtu ka të bëjë edhe me ndjesinë. Diçka brenda meje më thoshte që të zgjidhja bardheblutë.
- Cilat janë ambiciet tuaja me Tiranën?
Tirana dihet se kush është, edhe çfarë emri ka. Kjo do të thotë që ambiciet e Tiranës janë dhe do të jenë të mëdha gjithmonë për të qenë kampion. Kështu që synimi im është të bëj sa më mirë, të shpallemi kampionë, por edhe të synojmë për të marrë maksimumin në Kupat e Europës.
- Gjeni aty Deliun, Xhixhën, por edhe Kallakun... A do të rikthehet mesfusha e frikshme e Laçit të dikurshëm?
Me Xhixhën, Deliun, Kallakun, gjithashtu edhe Lulaj me Bytyçin kemi luajtur për disa vite bashkë. E njohim shumë mirë lojën e njëri-tjetrit. Dhe kjo është një favor për mua sepse janë dhe lojtarë me tepër kualitet. Jam i sigurtë që do të bëjmë mjaft mirë bashkë. Jemi si një familje me shumë kualitet.
- A synoni përmes Tiranës një aventurë jashtë vendit?
Është ekipi më me emër në Shqipëri dhe normal që ka shumë benefite nga skuadër. Mund të synosh të kapësh majat, por që gjërat duhen bërë hap pas hapi. Fillimisht të arrijmë objektivat që ka klubi, pastaj të tjerat rrjedhin natyrshëm.
- Kombëtarja shqiptare hyn në një epokë të re me trajnerin Sylvinho. A mund të jetë Lushkja pjesë e saj?
I uroj mirëseardhjen trajnerit Sylvinho. Shpresoj që të bëjë sa më mirë me ekipin tonë kombëtar dhe ta çojë Kombëtaren tonë atje ku e meriton. Edhe normalisht që është një synim që do të jetë gjithmonë nga ana ime. Është ëndërr të përfaqësoj kombin tim dhe besoj se kjo ditë mund të vijë shumë shpejt.
- Çfarë i premtoni Tiranës?
Ekipit dhe tifozëve të mrekullueshëm të Tiranës i premtoj që çdo ndeshje, unë bashkë me shokët e skuadrës do të japim shpirtin për të fituar çdo ndeshje. Në fund do të shpallemi kampionë sepse ky është dhe synimi kryesor i ekipit.
- Mesazhi për tifozët?
Janë tifozët më të mirë në vend. Do të shihemi shumë shpejt dhe bashkë mund të arrijmë gjëra të mëdha. Forca Tirona! /Gledi FEJZA/
Lexo gjithashtu
