Ekskluzive/ Nga menaxher në trajner, Marcello Troisi rrëfen Shqipërinë dhe projektin e tij

Sektori i Edukimit pranë FSHF-së shpërndau diplomat për kursin UEFA A pak ditë më parë, ku dy të huaj u licencuan në Shqipëri. Bëhet fjalë për brazilianin Marcello Troisi dhe kroatin Matko Djarmati. Braziliani në vendin tonë ka punuar prej dy vitesh si menaxher lojtarësh, ku të gjithë e njohin si agjenti i sulmuesit Gilberto që ka luajtur te Flamurtari dhe Tirana si dhe i lojtarëve të tjerë brazilianë që kanë luajtur për Kukësin, Skënderbeun dhe Bylisin.

Marcello Troisi kur drejtonte Kukësin

Megjithatë, Troisi në të shkuarën e tij ka pasur karrierë të pasur si futbollist, ndërsa në Shqipëri erdhi me synimin që të bëhej trajner me emër, por që nuk kishte licencat e duhura për të drejtuar në elitë. Ai bashkëpunoi me Partizanin si zbuluesh talentesh, por më pas u afrua te Kukësi në rolin e ndihmës trajnerit. Pas kësaj, ai mori drejtimin e skuadrës, duke e çuar në raundin e tretë të Europa League, por bëri dhe paraqitje të mirë në kampionat.

Pas largimit nga Kukësi ai u afrua te Skënderbeu si menaxher lojtarësh, ku ndihmoi presidencën korçare për të afruar futbollistë të ndryshëm. Punë e bërë me sukses, por që tashmë duket se po i vjen koha e shkëputjes edhe nga korçarët.

Troisi ndan dashurinë mes flamurit shqiptar dhe atij brazilian

I kontaktuar nga “Newsport.al” Mracello Troisi tregon planet për këtë sezon futbollistik, ku ka arritur akord me një klub të Kategorisë së Parë, por ende nuk ka firmosur. “Besoj se do të punoj shumë mirë në Shqipëri. Dëshira e parë është që  të punoj në Superiore, por duhet licenca UEFA PRO, unë kam vetëm UEFA A. Jam në bisedime me një skuadër të Kategorisë së Parë, por që nuk kam firmosur ende. Nuk mund të them se 100% është e mbyllur, pasi nuk kam hedhur firmën në kontratë. Kemi një projekt të mirë dhe që besoj se atë ekip do e ngre në Superiore. Emrin e skuadrës do e bëj publik në të ardhmen”.

Troisi tregon sesi i hodhi hapat e parë në Shqipëri, ndërsa thotë se lojtarët brazilianë apo të çdo lloj kombësie nuk i ka sjellë në kampionatin tonë duke bërë rolin e mirfilltë të menaxherit, pra për të përfituar para. “Unë punova për Partizani si skaut. Më pas shkova te Kukësi për trajner të dytë. Unë njoh lojtarë, sepse kam punuar atje. Unë i kam ndihmuar ata për t’i sjellë këtu jo për para”, vijoi braziliani Troisi.

Troisi me vajzën e tij

Duke qenë se braziliani bën dhe afrimin e lojtarëve, u pyet nëse do ta bëjë të njëjtën gjë edhe në skuadrën e tij. “Do të sjell lojtarë vetëm për skuadrën ku do të punoj. Kjo është puna ime, trajnimi. Nuk do të sjell më për të tjerët”, tha qartësisht Troisi.

Jeta e tij në Shqipëri ka qenë e ndarë mes Durrësit, Tiranës dhe Korçës. Jeton me familjen dhe ka një vajzë, ndërsa në shtëpinë e tij ende nuk kanë nisur të flasin shqip, pasi janë të tre brazilianë. “Kam dy vjet në Shqipëri. Nuk do të shkoj në Brazil për shumë kohë. E dua Shqipërinë dhe njerëzit këtu. Nuk besoj se do të kthehem pas në Brazil. Ka shumë diferencë mes Shqipërisë dhe Brazilit. Por, Shqipëria me kalimin e kohës do të ndryshojë. Jam i martuar me braziliane, kam një vajzë. Aktualisht jetoj në Korçë dhe presidenti Ardjan Takaj paguan shpenzimet e mia”.