Që pas largimit të Luigi Di Biagios dhe rikthimit në pankinë të Dritan Mehmetit, duket se Dinamo ka reflektuar. Skuadra dinamovite arriti të mos mposhtej në 7 ndeshje radhazi, ku gjashtë ishin në Superiore dhe një në Kupë, teksa humbja e vetme nën drejtimin e Mehmetit erdhi në ndeshjen e fundit përballë Vllaznisë.
Në një intervistë ekskluzive për “Newsport.al”, sulmuesi i Dinamos, Lorenco Vila flet për ‘frymën’ e re që ka sjellë Mehmeti në ekip. Vila gjithashtu thotë se duhet ta lënë pas humbjen me Vllazninë dhe të fokusohen në ndeshjet e ardhshme.
- Pas largimit të Di Biagios, ekipi mori një tjetër ‘frymë’. Cili është ndryshimi thelbësor që solli Mehmeti në skuadër?
“Trajneri i ri solli një frymë të re në ekip dhe besoj se ishte e nevojshme të kishte ndryshime në pankinë për shkak të rezultateve që mungonin. Në te gjitha ndeshjet me Mehmeti kemi treguar rritje në lojë dhe arritëm të gjejmë edhe rezultatin.”
- Ajo humbje përballë Vllaznisë?
“Asgjë nuk shkoj sic duhet dhe ashtu sic e kishim parashikuar ne, pasi e nisëm ndeshjen mirë duke shënuar gol. E kemi hedhur pas krahëve atë humbje dhe duhet të fokusohemi tek ndeshja e radhës. Kemi patur disa raste për të shtyrë topin në rrjetë. Dashur pa dashur skuadra kaloi në një ngërç pasi nuk po arrinim të shënonim.”
- Dy ndeshjet e ardhshme që luhen ndaj vendit të parë (Egnatias) dhe të fundit (Teutës)? Çfarë prisni nga këto dy sfida?
“Atmosfera në klub është shumë pozitive pavarësisht asaj humbje ndaj Vllaznisë. Jemi të uritur per sukses, por nuk është momenti për të pasur mendjen te ndeshjet e me Teutën, pasi kemi një ndeshje të vështirë tani dhe duhet të jemi të fokusuar aty.”
- E pret me emocion ndeshjen përballë durrsakëve, duke ditur që një pjesë të zemrës e ke aty?
“Tek Teuta jam rritur dhe kam kaluar momente më të bukura të karrierës sime. Do jetë një sfidë e veçantë për mua. Unë nuk ndaj asnjërën prej ekipeve, pasi e kam pasur për kënaqësi të jem pjesë e të dyjave dhe kam kaluar mjaft mirë. Kjo është falë ambientit miqësor që gjeta tek të dy skuadrat më me emër në Shqipëri.
- Cilat janë objektivat e Dinamos dhe objektivat e Vilës?
“Dinamo është ekip që arritjen e kupave të Europës e ka detyrim, por ne kemi si objektiv për të marrë maksimumin e çdo ndeshjeje radhe. Aktualisht dua që të fitojë ekipi dhe të marrim maksimumin në çdo ndeshje dhe më pas do mendoj për aspektin personal. Nuk dua të flas përpara kohe, rëndësi ka të shënoj sa më shumë dhe të arrijmë objektivat.”
- Akoma nuk është Vila që ishim mësuar të shihnim sezonin e shkuar, shkak ambientimi?
“Po është e vërtetë që ende nuk kam dalë në lojën time. Por duhet të jap akoma më shumë se kaq. Vija nga një periudhë jo e mirë dhe me dëmtime, por tashmë jam ambientuar siç duhet me Dinamon dhe premtoj që do të jap akoma më shumë se kaq.”
/Nikoll Andrea Rajta/
Lexo gjithashtu
