Një rikthim në shtëpi për Albi Dokën. Mbrojtësi i djathtë u transferua te Tirana si një nga goditjet më të bujshme të bardhebluve të cilët blindojnë kështu krahun e djathtë të mbrojtjes. Synimet janë maksimale për Tiranën, si zakonisht. Kalimi i turit në Conference League dhe objektivi i përhershëm, titulli kampion në Superiore.
Në një intervistë ekskluzive për Newsport.al, Albi Doka nuk nguron të flasë hapur pa “diplomaci”. Ai thotë shkurt e qartë se kanë pretendime madhore. I pyetur për rikthimin në Kombëtare, Doka beson se i plotëson të gjitha kushtet për të veshur sërish fanellën kuqezi. Në fund e mbyll me një paralajmërim për rivalët teksa u thotë se nuk e kanë idenë se çfarë i presin.
Albi, rikthim te Tirana, si janë emocionet e para?
-Rikthimi është një emocion shumë i madh. Te Tirana kam dalë si futbollist dhe këtu u rrita.
A ju joshi oferta e majme e Refik Halilit apo dëshira për të kontribuar për ngjyrat bardheblu?
-As nuk e kam menduar fare, unë doja vetëm të rikthehesha te Tirana. Asgjë tjetër!
Me Tiranën keni provuar te gjitha emocionet, nga renia një kategori me poshtë deri te titulli kampion në sezonin e fundit, po tani çfarë pretendoni?
-Këtë sezon kemi pretendime madhore. Fillimisht të kalojmë sa më shumë raunde në Conference League dhe më pas sigurisht që të fitojmë titullin kampion, një objektiv që Tirana e ka çdo vit.
Shumë afrime por dhe shumë largime. Tirana më e fortë apo…?
-E vërtetë që ka patur shumë lëvizje, por klubi ka marrë vendimet e duhura. Tirana e këtij sezoni është shumë më e fortë, shumë!
Një sezon i mirë me Tiranën mund t’ju hapë sërish rrugën ne Kombëtare, e shihni veten në planet e Sylvinhos?
-Normalisht që e shoh veten time në Kombëtare. Besoj se e kam treguar se kush jam dhe çfarë mund të bëj. Shpresoj të bëj mirë me Tiranën dhe pastaj të rikthehem në Kombëtare.
Me Tirona Fanatics keni patur nje lidhje të fortë, çfarë mesazhi keni për ta?
-Me tifozët e Tironës kam një lidhje shumë të fortë. Për mua ata nuk janë thjeshtë më të mirët në Shqipëri, por më të mirët në botë.
“Paralajmërim” për rivalët?
-As nuk e keni idenë se çfarë ju pret./Gledi FEJZA/
