Jorgo Pëllumbi është një nga lojtarët e rinj që i është bashkuar skuadrës së drejtuar nga trajneri Ilir Daja. Talenti 17-vjeçar ka dalë nga skuadrat zinxhirë të Skënderbeut ( i ardhur më parë nga Akademia e Olimpiakosit, Pire) dhe tashmë është gati të debutojë me ekipin e parë bardhekuq. Por siç duket e ardhmja e tij do të jetë e "artë".
Newsport.al ka mësuar ekskluzivisht se saktësisht para dy muajsh, tre menaxherë kanë ardhur nga Franca për të "mbikëqyrur" lojtarin në fjalë. Erkan Sulejmani, Frederiko Gueres (ish-menaxher i Benzemas) dhe Fransua kanë qenë në Korçë ku kanë nënshkruar një kontratë 2-vjeçare me klubin e Skënderbeut.
Të njëjtat burime bëjnë me dije për newsport.al që me menaxherët në fjalë është arritur marrëveshja që ata të përfaqësojnë mesfushorin e majtë për 5 vitet e ardhshme.
Kujtojmë që të shtunën trajneri Ilir Daja foli për përballjen e së enjtes kundër Young Boys, ku deklaroi që në Zvicër do të hedhë në fushë një lojtar të ri. Nuk dihet ende nëse do të jetë ose jo talenti 17-vjeçar, megjithatë nuk është çudi po ta shohim në 18-she. Politikat e klubit të Skënderbeut tashmë dihen, rritja e talentëve dhe shitja e tyre jashtë vendit.
Ai ishte titullar në ndeshjen e Kupës në Lezhë, ku Skënderbeu fitoi me rezultatin 1-0 kundër Besëlidhjes. Është aktivizuar në dy ndeshjet kundër Mamurrasit, po në kuadër të Kupës së Shqipërisë. Gjithashtu ka qenë pjesë e Kombëtares U-17 në kampionatin Europian që u zhvillua vjet në Itali. Sfidën e parë me Skënderbeun e ka luajtur 16 vjeç, në ndeshjen e vitit të shkuar për Kupë kundër Butrintit, ku ishte në fushë për 86 minuta.
Pëllumbi ka luajtur shumë ndeshje me ekipin e drejtuar nga Jani Kaçi, ku është aktivizuar si titullar. Përgatitjet i ka kryer me skuadrën e parë nën drejtimin e trajnerit Ilir Daja dhe tashmë transferta e Zvicrës në kuadër të Europa League mund të jetë një vitrinë e mirë për 17-vjeçarin që të shpalosë vlerat e tij. Aktivizimi i tij kundër Young Boys do të ishte risi, pasi futbollistë me moshë të tillë rrallë shihen në kompeticione të mëdha. Ai është grumbulluar me ekipin në kompleksin "Tropikal". /NEWSPORT.AL/ Retin TOKA/
[gallery size="full" columns="1" ids="177588"]
Lexo gjithashtu
