Vllaznia do të luajë të dielën kundër Tiranës, ndeshjen e vlefshme për javën e 17-të të “Abissnet Superiore”. Një sfidë e programuar të zhvillohet në stadiumin “Selman Stërmasi” dhe që pritet me emocion mjaft të madh nga të gjithë tifozët duke ditur që kjo ndeshje njihet si “Klasikja” e futbollit shqiptar.
Të njëjtat emocione për këtë ndeshje i shpreh dhe Herald Marku. Në një intervistë ekskluzive për “Newsport.al”, Marku që në të kaluarën ka veshur fanellën kuqeblu tregon për emocionet që i ka sjellë “Klasikja”. Ai flet për golat e shënuar ndaj Tiranës në “Klasiket” e kaluara dhe shprehet se nuk do t’i harrojë kurrë. Gjithashtu Marku flet për Kombëtaren shqiptare, duke e quajtur si një ‘ëndërr’ për këdo, por edhe për momentin e vështirë që po kalon momentalisht me ekipin e Arad në Rumani, skuadër tek e cila u transferua në verën që lamë pas.
- E nisët mjaft mirë në Rumani me Arad, por kohët e fundit nuk keni luajtur rregullisht.
“Pata një nisje mjaft pozitive dhe mendoj se u ambientova shumë mirë. Ndërsa tani jam në një moment që më duhet të luftoj për të rifituar vendin e titullarit.”
- Transferimin jashtë Shqipërisë e shihnit si një mundësi për të arritur Kombëtaren?
“Kombëtarja është një dëshirë dhe ëndërr për këdo. Mendoj se transferimi në një kampionat më të mirë të jep një shtysë më të madhë drejtë saj.”
- Cili është ndryshimi mes kampionatit shqiptar dhe atij rumun?
“Kampionati rumun është me nivel shumë më të mirë si teknik apo fizik, ndryshe nga Superiorja.”
- Si e shihni këtë sezon dhe formën aktuale të Vllaznisë?
“Vllaznia ka patur shumë ndryshime në përbërje dhe ka hasur vështirësi. Por tani duket se çdo gjë po shkon siç duhet.”
- Të dielën luhet "Klasikja" Vllaznia – Tirana. Si një ish i shkodranëve, cili ekip mendoni se do të triumfojë?
“Klasikja e futbollit shqiptar është një ndeshje shumë e bukur dhe tepër e veçantë. Të tilla ndeshje, sido që të jenë format aktuale të skuadrave nuk mund të japësh një parashikim për rezultatin, por thjesht ta shijosh në maksimum.”
- Ju keni shënuar 4 gola përballë Tiranës në “Klasiket” e shkuara, por në atë sfidë të 21 nëntorit 2020, ku Vllaznia fitoi 3-2 ju gjetët dopietën.
“Çdo gol është emocion shumë i madh. Por të shënosh në atë ndeshje të jep një tjetër adrenalinë. Ka qenë një ndeshje e veçantë që më ka dhuruar emocione që nuk do t’i harroj kurrë.”
- Herët apo vonë do të kemi një rikthim të Markut në Superiore?
“Herët apo vonë, po. Padiskutim që do të rikthehem në Superiore.”
- Një mendim për ecurinë e Kombëtares dhe shortin e Europianit?
“Të gjithë jemi të lumtur me ecurinë e Kombëtares deri më tani. Sigurisht dhe me pjesëmarrjen në Europian. Është një short shumë i vështirë, por jam i sigurt që do të jemi një surprizë e bukur.”
/Nikoll Andrea Rajta/
Lexo gjithashtu
