Klubi i Tiranës është njohur me vendimin e UEFA-s teksa ka mësuar se shuma prej 215 mijë eurosh e përfituar nga pjesëmarrja në Kupat e Europës do të bllokohet për shkak të "hileve" të bëra në dokumentacionin për licencimet. Por si qëndron e vërteta në këtë histori?
Newsport.al ka mësuar ekskluzivisht nga burime të besueshme se është Federata Shqiptare e Futbollit ajo që ka "djegur" Tiranën. Fillimisht klubi bardheblu ka dorëzuar pranë FSHF-së dokumentacionet e nevojshme, por që janë kthyer mbrapsh. Më pas, klubi bardheblu ka lidhur një marrëveshje me tatimet për pagesa me këste. Gjithçka është konsideruar e rregullt nga Federata jonë dhe është dhënë "OK"-ja që Tirana të licencohet.
Por, në fakt në këtë mes ka disa prapaskena. Ndryshe nga sa pasqyrohet në media, është po vetë Federata Shqiptare e Futbollit që ka raportuar në UEFA se licencimi nuk ka qenë i rregullt dhe nuk është bërë nga vetë ajo, por nga Komisioni i Licencimeve. Megjithatë ky organ vepron pranë FSHF-së dhe sigurisht drejtuesit duhet të japin llogari dhe në të njëjtën kohë edhe të mbrohen.
Ata kanë raportuar pranë UEFA-s listën e punonjësve duke u justifikuar se janë shkarkuar nga puna njerëzit që dhanë licencën klubit bardheblu për pjesëmarrjen në Kupat e Europës për sezonin 2017-2018. Pra me këtë, ata e kanë hequr fajin nga vetja duke ia kaluar tërësisht drejtuesve të klubit bardheblu.
Pra siç shihet në gjithë këtë gjullurdi, është Federata Shqiptare e Futbollit që ka dëmtuar klubin e Tiranës. Bardheblutë kanë apeluar javën e shkuar në CAS vendimin e UEFA-s dhe pritet vendimi përfundimtar i institucionit më të lartë të drejtësisë sportive. Tashmë mes klubit më të titulluar në Shqipëri dhe Federatës Shqiptare të Futbollit ka një konflikt të hapur. /Newsport.al/
Lexo gjithashtu
