Mentor Zhdrella ka varur “këpucët në gozhdë”. Një nga lojtarët më të mirë të dekadës së fundit në Kosovë ka vendosur t’i japë fund futbollit të luajtur.
Lajmi bëhet me dije në rrjetet sociale, teksa përmes një postimi në facebook, ai zbulon vendimin e rëndësishëm. 32-vjeçari mes emocioneve tregon karrierën e tij duke falënderuar këdo që e mbështeti.
“Të dashur miq Çdo fillim e ka fundin e vetë, edhe karrierës time si futbollist i erdhi fundi.
Ndihem jashtëzakonisht i lumtur sepse kam arritur ëndrrën time për të luajtur sportin që dua. Ai më dha disa nga momentet më të mira të jetës sime, më ka dhuruar shumë kënaqësi dhe suksese.
Ndjej kënaqësi të jashtëzakonshme kur kthej kokën mbrapa dhe shikoj atë çfarë kam bërë në futboll në këto 20 vite të kaluara, ku kam bërë shoqëri fantastike dhe shumë trofe të fituara si dhe suksese individuale të arritura.
Dua të falënderoj të gjithë ata që kanë qenë pjesë e karrierës sime, të gjithë trajnerët, klubet ku kam luajtur, të gjithë bashkëlojtarët, fansat, anëtarët e familjes dhe miqtë.
Jam gjithmonë mirënjohës klubit të 2 Korrikut, aty ku fillova ta jetësoj ëndrrën. Po ashtu e paharruar në memorjen time do të mbetet epoka që kam kaluar me Prishtinën, Hysin, Dritën, Feronikelin, Llapin, Dukagjinin e Kekun si dhe kulminacioni i krenarisë që ishte fanella e kombëtares së Kosovës.
Me respekt, Mentor Zhdrella”, shkruante sulmuesi në facebook-un e vet.
Kujtojmë që Zhdrella ka provuar edhe një aventurë të shkurtër në vendin tonë. Ai u transferua në korrik të vitit 2014-të te Partizani. Aventura e tij tek të kuqtë zgjati vetëm 20 ditë, pasi zgjodhi të largohej sepse nuk mundi të përshtatej me jetën e kryeqytetit.
Lexo gjithashtu
