Sfida përfundoi 1-0 për Lushnjen, ndërsa ajo që ka shqetësuar drejtuesit e klubit të Dinamos dhe tifozët e skuadrës kryeqytetase kanë qenë pikërisht dyshimet se 4 lojtarë titullarë kanë toleruar në fushën e lojës.

Edhe zëvendësimet e trajnerit të Dinamos, Igli Allmuça gjatë ndeshjes, duke larguar nga fusha dy titullarë të padiskutuar të skuadrës për shkak të impenjimit të tyre të ulët kundër Lushnjes kanë bërë që dyshimet e drejtuesve për formën e lojtarëve të rriten së tepërmi.

Mësohet se drejtuesit e klubit të Dinamos kanë diskutuar pas ndeshjes momentin e pësimit të golit të shënuar nga Branica i Lushnjes, duke pretenduar për pasivitet të mbrojtësve të ekipit kryeqytetas, ndërsa diskutime ka pasur edhe për produktivitetin e ulët të lojës sulmuese.

Një gjë e tillë ka sjellë edhe përçarje mes lojtarëve të Dinamos ndërmjet tyre. Ndërkohë që drejtuesit e klubit të Dinamos, gjatë këtyre ditëve kanë vijuar me grumbullimin e informacioneve për ndeshjen ndaj Lushnjes dhe nuk përjashtohet fakti se mund të merren masa drastike ndaj disa prej titullarëve, gjithnjë nëse dyshimet për tolerim ndaj Lushnjes do të vërtetohen.