UEFA Women's Champions League do të zbresë në mitikun “Loro Boriçi” me shpresën e madhe për të bërë historinë nga qyteti që nisi zanafilla e “top këmbës”. Ditën e mërkurë, datë 21 shtator ora 18:00, Vllaznia e femrave do të përballet me Vorskla Kharkiv 2 në një duel të një rëndësie të madhe, pasi përcakton se kush nga dy ekipet do të jetë pjesë e raundit final me më të mirat e Europës.
Klubi Vllaznia në një komunikim zyrtar në rrjetet sociale u ka bërë thirrje të gjithë sportdashësve dhe tifozave të saj që të jenë në mbështetje masive për ekipin e femrave që janë vetëm një hap larg historisë për gjithë Shkodrën dhe futbollin në Shqipëri.
Njoftimi i klubit Vllaznia:
"Të dashur tifozë të Vllaznisë!
Ju bëjmë me dije se ditën e mërkurë, datë 21 shtator ora 18:00 në stadiumin "Loro Boriçi" të Shkodrës do të luhet ndeshja e parë e fazës play-off të "UEFA Women's Champions League" në mes ekipit ukrainas Vorskla Kharkiv-2 dhe Vllaznisë tonë. Kjo e fundit ka nevojë për ndihmën tuaj sepse është shumë pranë arritjes historike, kalimit në fazën e grupeve të këtij kompeticioni shumë të rëndësishëm europian në futboll për femra. Në këto rrethana, vajzat tona presin mbështetjen tuaj në shkallët e stadiumit. Me përjashtim të tribunës qendrore ku çmimi i biletës është 500 lekë, në të gjitha tribunat e tjera hyrja do të jetë falas. Ftojmë të gjithë tifozët, në veçanti nxënësit e shkollave, fëmijëve e të gjithë ekipeve dhe Akademive në Shkodër, që të jenë në stadium për ta mbështetur Vllazninë në këtë ndeshje shumë të rëndësishme.
Eja edhe ti!
Vllaznia ka nevojë për ty!".
Lexo gjithashtu
