Të shtunën e 23 shtatorit në orën 18:00, Skënderbeu do të presë Kukësi në Korçë për të zhvilluar ndeshjen e vlefshme për javën e 5-të të Kategorisë Superiore.
Skënderbeu vjen në këtë sfidë me 6 pikë të grumbulluara deri më tani. Korçarët renditen në vendin e 4-të të klasfikimit. Në krahun tjetër Kukësi nuk ka marrë akoma pikën e parë në këtë sezon të ri të Superiores dhe ndaj Skënderbeut kërkon ta bëjë “sefte”.
Në prag të kësaj sfide, trajneri i Skënderbeut, Ivan Gvozdenovic u prononcua për mediat.
“Si fillim dua t’i kërkoj falje tifozëve për dy humbjet që kemi pësuar. Dy humbje radhazi për ne dhe unë e di si ndihen tifozët në këtë moment. Edhe po të na kritikojnë kanë të drejtë. Nesër ndaj Kukësit, nëse jemi të gjithë bashkë duhet të bëjmë një atmosferë si ndaj Dinamos. Nesër mendojme vetëm për fitoren dhe asgjë tjetër”, u shpreh trajneri i korçarëve.
“Nuk mund të them se jam i kënaqur apo i pakënaqur me 6 pikë. Për mendimin tim në këto katër javë të para duhet të kishim 1 pikë më shumë”, shtoi më tej tekniku i Skënderbeut.
Kur u pyet për Ermir Rashicën nëse do të jetë titullar apo jo, Gvozdenovic u përgjigj:
“Asnjë lojtar nuk është titullar, pasi në skuadër jemi 25 lojtarë. Kjo gjë vlen për të gjithë lojtarët. Kosta, Rashica apo të tjerë, kjo gjë vlen për të gjithë. Rashica është një sulmues shumë i talentuar, tregoi cilësi në këto javë, por mund ta nisë nga pankina”, e mbylli fjalën e tij Ivan Gvozdenovic.
Lexo gjithashtu
