Flamurtari u penalizua ditën e djeshme me heqjen e 6 pikëve në renditje, ndërsa është "kërcënuar" me zbritjen në një kategori më poshtë nëse brenda 12 ditëve nuk do të paguajë borxhet ndaj Polizoi Arbërit dhe Artan Sakajt.
Veç tyre, mbeten për t'u paguar Franc Veliu, Erjon Vucaj dhe Ernest Gjoka, të cilët presin ekzekutimin e vendimit. Në rast se brenda 12 ditësh Flamurtari paguan Arbërin dhe Sakajn, FSHF-ja do ta detyrojë të paguajë dhe tre emrat e tjerë, të cilët në datën 14 presin që të shlyhen, ndryshe do të ketë sërish zbritje pikësh për kuqezinjtë.
Por, tashmë "topi në derë" nuk i ka mbetur vetëm Sinan Idrizit, administratorit të Flamurtarit, por edhe Bashkisë së Vlorës, e cila është bashkëfajtore për situatën që gjendet skuadra. Këto borxhe nuk njihen nga administruesit aktualë, ndërsa janë të mbartuar nga presidenca e Bashkisë Vlorë, e cila drejtohej asokohe nga Shpëtim Gjika.
Por, kur të gjithë presin një reagim nga drejtuesit e shkuar, askush nuk është në gjendje që të ngrejë telefonin e të sqarojë situatën e periudhës kur janë akumuluar këto borxhe. Heshtja e Bashkisë së Vlorës dhe kreut të saj, Dritan Leli, do të thotë se e pranojnë fajin, megjithatë, Flamurtari tashmë është vërtetë në rrezik...
Lexo gjithashtu
