Luiza Gega, atletja shqiptare u shpall disa ditë më parë kampione e Europës në garën e 3000 metrave me pengesa, në Europianin e zhvilluar në Mynih të Gjermanisë.
E arta e parë shqiptare në këtë aktivitet meriton të gjitha nderimet, me institucionet shtetërore që kanë zhvilluar edhe cermoni zyrtare. Sot, në ambientet e kryeministrisë, Edi Rama ka pritur kampionen shqiptare.
Kryeministri i vendit i ka puthur duart Luizës, me Gegën që dukshëm ka qenë e emocionuar për këtë rezultat. Të pranishëm në këtë ceremoni kanë qenë ministra dhe zyrtarë të tjerë të qeverisë shqiptare, duke falenderuar Luiza Gegën për ngritjen e flamurit shqiptar. Në këtë ceremoni, Gega është parë e emocionuar dhe me lot në sy gjatë fjalës së saj.
“Sot jam më e emocionuar se kurrë. Vendosa të vishem kuqezi për t’i treguar Evropës se edhe ne nga një vend i vogël vlejmë edhe më shumë se ata.
Dua të falenderoj familjen time, që pa ta do ishte e vështirë. Faleminderit trajnerit tim, pa të nuk do isha në majën e Europës. Faleminderit kryeministër, ndihem më e vlerësuar se kurrë. Faleminderit minsitre, falë ndërhyrjeve në sport bëtë që të jemi më të motivuar.
Falenderoj Erion Veliajn, ka qenë politikani më afër meje. Më ka pyetur çdo kohë nga ana njerëzore si shkon stërvitja. Sporti nuk do t’ia dijë për politikë. Për mbështetjen e vazhdueshme ju falenderoj. Besoj që ia kam dalë. Falenderoj Erkandin, Izmirin, Brikenin që më kanë mbështetur me sukseset e tryre. Nuk ka ligj për sponsorizimet, sepse do kishte më shumë mbështetje nga bizneset dhe shpresoj që kjo të zgjidhet.
Falenderoj edhe KOKSH, me Fidel Yllin në krye kemi pasur një mbështetje që në Lojërat Olimpike. Faleminderit të gjithëve që keni ardhur sot për mua. Federata më ka qëndrua pranë. Sponsori Kristo Naçi ka besuar te unë. Drejtorja e Klubit Tirana ka një frymë të re në sport, faleminderit për mbështjetjen.
Dua të kthehem pas në kohë, si ka nisur ky rrugëtim. Bashkë me trajnerin, u kthyem në kohë. Para 12 vitesh, në Paris unë isha në kampionatin europian. Dola nga fundi dhe me diferencë. Isha me ngjyrat kuqezi dhe ndjeja përgjegjësi, fola me trajnerin që nuk do përfaqësoja vendin tim në këtë nivel. Këtu ishte ndarja e punës sime, për të qenë konkurruese. Trajneri më shpjegoi se duhet punë dhe sakrificë, stërvitje në shi e të ftohtë.
Bëmë hapa, jo të mëdhenj por të sigurt. Theva rekorde kombëtare, dominova Ballkanin dhe më pas medalje të tjera. Nuk ka qenë aq e lehtë sa duket. Nga dëmtimet nuk jam dorëzuar.
Kam pasur oferta nga vende të tjera, por asnjëherë s’e kam menduar të lë vendin tim. Kemi ecur përpara edhe me institucionet që na mbështesin. I them trajnerit që doja të isha edhe njëherë 20 vjeç. Sot jam 33 dhe nuk është kurrë vonë për t’ia dalë në sport me sakrifica. Emocionet në pistën e Mynihut kanë qenë të mëdha.
Mediet evropiane komentuan si një festë për vendin tonë. Valvitja e flamurit dhe himni në atë vend të zhvilluar ishte një emocion më vete. Të gjithë të rinjtë do ja dalin nëse duan, nëse e duan këtë vend. Do ketë vështrësi dhe sakrifica. S’e kam ndjerë kurrë këtë mbështetje nga njerëzit e vendit tim, i kam ndjerë afër”, tha Gega.
Lexo gjithashtu
