Drejtori Sportiv i Tiranës, Devi Muka flet pas sfidës kundër Skënderbeut që bardheblutë e mbyllën në barazim 2-2.
“Ishte një ndeshje pozitive. Në përgjithësi jemi të kënaqur me atë çka skuadra dha në fushën e lojës. Mund të kishim fituar nëse do të shfrytëzonim rastet e tjera që na u paraqitën. Mungesa e tifozëve na ka penalizuar, por nëse bëhemi të gjithë bashkë mund të kalojmë çdo situatë”, tha Muka në një prononcim për mediat.
Për sa i përket gjendjes së skuadrës dhe objektivave të merkatos, Drejtori Sportiv i Tiranës u shpreh: “Dëmtimet na kanë penalizuar gjithashtu. Muça dhe Karabeci kanë pasur probleme me dëmtimet. Elis Bakaj? Ishte në planet tona në merkaton e dimrit, por shpresojmë që ta marrim në verë”.
Për sa i përket objektivave të këtij sezoni dhe të ardhmes, ish-kapiteni bardheblu u shpreh: “Vendi i 4-t për këtë sezon, mendoj se nuk është i paarritshëm. Kemi pasur luhatje, por pozitive është që kemi fituar të rinjtë. Akademia po funksionin. Doka, Cake dhe të tjerë tashmë janë afirmuar si ‘prurje’ të reja në ekip dhe janë lojtarë me të ardhme. Vitin tjetër do të jetë tjetër histori për Tiranën. Duke ruajtur boshtin e këtij ekipi që kemi aktualisht dhe me disa përforcime të reja në verë do të krijojmë një ekip edhe më kompetitiv”, përfundoi Devi Muka.
Loading ...
