Partizani do të luajë përballë Tiranës ditën e premte ndeshjen e vlefshme për javën e 24-të të “Abissnet Superiore”. Sfida që do të zhvillohet në stadiumin “Air Albania” do të startojë në orën 19:00. Një sfidë që nuk luhet vetëm për 3 pikët, por luhet më së shumti për prestigj. Në lojë është kryeqyteti, ku presim të shohim se cilat ngjyra do të marrë këtë herë. Derbi gjithmonë ka patur interes, jo vetëm nga lojtari i 12-të që janë tifozët, por edhe nga protagonistë të së shkuarës.
Një ndër to është edhe Hektor Idrizaj. Në një intervistë ekskluzive për “Newsport.al”, mbrojtësi që vendosi të tërhiqej nga futbolli vetëm disa ditë më parë tregon arsyen e këtij vendimi. Por gjithashtu flet për sezonin aktual të Elbasanit në Kategorinë e Parë, ekip në të cilin luajti para se të “varte këpucët në gozhdë”. Por si një ish-lojtari i “Demave”, Idrizaj nuk kishte si mos të fliste për derbin e së premtes. 34-vjeçari që doli kampion me Partizanin në vitin 2019, thotë se ekipi i drejtuar nga Orges Shehi është më i favorizuar nga ana psikologjike. Ai gjithashtu tregon se cilët ekipe sipas tij do të përfundojnë në “Final Four”.
- Përse e morët këtë vendim të papritur për t’u tërhequr nga futbolli?
“Ishte vendim shumë i vështirë. Unë besoj se për të gjithë futbollistët është një vendim i tillë. I kisha premtuar vetes që tek unë nuk do të kishte vend shprehja ‘të la sporti, s’e le ti’. Ishin shumë komponentë që u bënë bashkë, një ndër to ishin edhe dëmtimet. Por besoj se ishte momenti për t’u tërhequr.”
- Kujtimi më i bukur dhe më i vështirë nga karriera juaj e gjatë?
“Të dy kujtimet lidhen me Partizanin. Momenti më i vështirë është dëmtimi në derbi. Ndërsa kujtimi më i bukur është padyshim titulli i fituar me ‘demat’. Por ka edhe shumë momente të tjera të bukura padiskutim, duke futur këtu vitet e shumta të karrierës.”
[caption id="attachment_723682" align="alignnone" width="312"]
Hektor Idrizaj kur doli kampion me Partizanin[/caption]
- Do ju shohim në rolin e trajnerit në një të ardhme të afërt?
“Sa i përket të ardhmes në rolin e një trajneri është pak e vështirë të them diçka. Është fillimi i një rrugëtimi të ri, por këtu gjej rastin të falenderoj klubin e Elbasanit që më hapi këtë derë të re. Sepse siç dihet është pak e vështirë kur e lë sportin. Edhe kur gjen këtë lloji mbështetje është shumë domethënëse për një sportist edhe i jep një shtysë më tepër për të ecur përpara.”
- Si e shihni sezonin aktual të Elbasanit?
“Sezoni aktual i Elbasanit është brenda të gjitha pritshmërive dhe objektivave që janë vendosur që në fillim. Edhe pse sipas opinionit personal mendoj se duhet të kishim bërë më shumë, por edhe duhet të bëjmë më shumë. Megjithatë duhet përgëzuar puna kolosale që ky klub ka bërë në 3 vite. Sigurisht që vazhdimi do të jetë i ndritur edhe këto falë mirorganizimit dhe bashkëpunimit të të gjithëve, kryetar bashkie, president, administrator, shef klubi, staf drejtues dhe sportistë. Edhe jam i sigurt që do bëjmë diferencën edhe në vazhdim.”
[caption id="attachment_723683" align="alignnone" width="566"]
Hektor Idrizaj gjatë prezantimit te Elbasani[/caption]
- Jemi në prag të ndeshjes Partizani-Tirana, ç’kujtime ju sjell derbi?
“Kjo ndeshje padyshim që më sjell kujtime shumë të bukura, por edhe të hidhura. Por sporti kështu e ka, në bazë të rezultatit. Është një ndeshje vitrine në kampionatin tonë që duhet shijuar në çdo moment besoj, sepse është pika kulmore e sportit shqiptar.”
- Cilët shihni favorit në derbi?
“Derbi nuk mendoj se ka favorit. Në derbi futesh vetëm për fitore. Nuk merret parasysh se në çfarë gjendje është ekipi, vjen nga një moment i mirë apo jo. Në derbi mjafton një shkëndijë e vogël dhe ndeshja mund të kthehet. Prandaj kjo sfidë do përqendrim të madh.”
- Kush mendoni se do të jetë vendimtar që do të vendosë fatet e ndeshjes?
“Unë mendoj se vendimtar do të jetë ana psikologjike e lojtarëve dhe ambientin nga i cili rrethohen. Të dy ekipet vijnë nga momente jo të mira, por bazuar nga eksperienca personale, Partizani është më i favorizuar nga ana psikologjike sepse të lejon të punosh i qetë gjatë gjithë vitit, por sidomos në derbi.”
- Pika e dobët dhe e fortë e Partizanit sipas jush?
“Sa për pikat e dobëta dhe të forta, Partizani i ka të dyja. Pikë të fortë, siç e përmenda edhe më lart ka ambientin e qetë para derbit. Po ashtu dhe stafi drejtues janë mësuar me ndeshje të mëdha si drejtues ashtu edhe lojtarë. Edhe mendoj se do e menaxhojnë shumë mirë. Pikë e dobët ka qenë menaxhimi i reagimit të ekipit pas pësimit të golave. Duhet të tregohen pak më të matur edhe të kenë më shumë vetëbesim. Loja është 95 minuta jo vetëm atë minut që pëson.”
[caption id="attachment_723686" align="alignnone" width="512"]
Hektor Idrizaj me ekipin e Partizanit[/caption]
- Skuadra më e mirë e momentit në Superiore?
“Aktualisht, duke u bazuar në rezultate mendoj se skuadrat më të mira të momentin janë Egnatia, që ka treguar një ecuri konstante të kënaqshme, por edhe Vllaznia që ka 8 ndeshje pa disfatë. Vllaznia duhet përgëzuar për ndryshimin që ka bërë nga janari e në vazhdim. Mendoj se një meritë të madhe ka dyshja Osmani, por sidomos drejtori (qesh). Por edhe lojtarët që ka brenda skuadrës si Balaj, Mala, Hakaj, Krymi etj.”
- Cilat mendoni se do të jenë skuadrat që do ta përfundojnë sezonin në “Final Four”?
“Sa i përket 4 skuadrave që do të dalin në “Final Four”, mendoj se është një luftë interesante. Egnatia, Partizani, Vllaznia, Tirana, por edhe skuadra të tjera që janë shumë afër me pikë. Do të jetë shumë e hapur pasi vetë skema e kampionatit të lejon që të besosh.” /NIKOLL RAJTA/
Lexo gjithashtu
