Trajneri i Kukësit Ernest Gjoka ka përgënjeshtruar sot në faqen e klubit artikullin e “Panorama Sport”. Fjalët e thëna prej tij katër ditë më parë, çuditshëm janë botuar ditën e enjte në gazetën sportive duke marrë po kaq çuditshëm hapësirën kryesore. Deklarata jo vetëm që nuk është e ditës së djeshme, por as nuk është thënë ashtu si e kanë interpretuar. Trajneri i Kukësit katër ditë më parë në Televizionin Publik Shqiptar, deklaroi në “Rubrikën Sportive”: Çdo gjë është në varësi të shumë gjërave. Megjithatë çdo gjë ka nevojë për aleanca, aq më tepër kur shohim që edhe politika vjen në pushtet mes aleancave. Unë mendoj që Kukësi deri tani nuk ka patur asnjë aleancë. Do më pëlqente të kisha aleat Partizanin ose Skënderbeun pasi kështu do ta kishim më te lehtë rrugën. Ne kemi marrë përsipër një objektiv madhor. Deri më sot që flasim nuk kam patur mundësinë të shoh se kush është aleati im. Për momentin jemi shumë të fokusuar te kampionati. Kjo është shumë e rëndësishme. Kupën do ta shikojmë në ndeshjen e kthimit. Duam të ecim gjithëkund por unë mendoj se po filluam të sakrifikojmë gjithkund atëherë do dëmtohemi”.
Kanë mjaftuar këto fjalë për ta bërë fakt aleancën nëpërmjet një titulli të vendosur në hapësirë kryesore të faqes së parë. Gjokën dhe Kukësin e ka irrituar kjo manovër tendencioze e gazetës që ka rikthyer me katër ditë vonesë një deklaratë të së dielës. Përgënjeshtrimi ka ardhur menjëherë dhe jo vetëm kaq, por Kukësi ka menduar të aplikojë heshtjen për shtyp në prag të përballjes me Tiranën duke dashur të mos bëhet pjesë e lojrave mediatike që mund të cënojnë imazhin e klubit.
Si e përgënjeshtroi Gjoka sot “Panorama Sport”
"Më vjen shumë keq që fjalët e mia keqinterpretohen dhe marrin një kuptim të transformuar. Dua të sqaroj edhe një herë se Kukësi është i vetëm në garën e tij dhe qëndron larg aleancave. Ne që nga fillimi e deri në fund do t'i besojmë vetëm forcës tonë dhe do të japim maksimumin duke punuar dhe sakrifikuar të gjithë si klub. Nëse fjalët e mia keqinterpetohen dhe nxirren konteskte të paqëna nuk është faji im. E theksoj se ne jemi të vetëm"
Lexo gjithashtu
