Sezoni i fundit ishte për t’u harruar për Tiranën. Bardheblutë humbën titullin kampion kundër rivalëve të përbetuar vetëm në ndeshjen e fundit të kampionatit. Kryeqytetasit kanë ‘rezervat’ e tyre, sidomos për ngjarjet në Rrogozhinë në ndeshjen me Bylisin, por ajo që ndodhi tani është e kaluar.
Për gjatë gjithë atij sezoni, trajneri Orges Shehi ka vuajtur javë pas jave për të mbajtur në formën ideal grupin e cunguar që kishte. Alternativat mungonin dhe kryesisht përdori vetëm 12-13 lojtarë për më shumë se 3 faza e megjithatë ia doli të rivalizonte deri në fund të garës, madje duke prekur edhe finalen e Kupës.
Presidenti Refik Halili, duket se i ka kërkuar “falje” teknikut dhe firmosi çekun e bardhë në merkato. Nëse ka një mbretëreshë të merkatos verore në Superiore, ajo padyshim është Tirana. Bardheblutë kanë afruar në skuadër lojtarë të sprovuar e mjaft cilësor për nivelin e kampionatit shqiptar.
Rikthimet e dy djemve të shtëpisë, Hoxhallari e Doka, portierin e Kombëtares Gentian Selmani, një mjeshtër titujsh si Gledi Mici, një mesfushorë si Jonuzi e dy sulmues si Latifi e Kaina, shto këtu edhe lojtarët e vet si Najdovski, Lushkja, Deliu, Hasani e Abazaj, e bëjnë Tiranën një ekip të frikshëm.
27-herë kampionët e vendit më në fund janë një ekip i dubluar në çdo pozitë dhe Orges Shehi ka luksin të zgjedhë mes shumë alternativave cilësorë. Titulli kampion mbetet objektivi i vetëm i Tiranës, por këtë sezon është më shumë një hakmarrje. Të gjithë sytë janë tek Shehi dhe djemtë e tij, nëse ia doli të luftonte ‘dhëmbë për dhëmbë’ me 12 lojtarë, të shohim se çdo të jetë i aftë të bëjë me një grup të plotë.
Lexo gjithashtu
