Pak ditë më parë në Angli u zhvillua referendumi për daljen e këtij shteti nga Bashkimi Europian, ndërsa vullneti i popullit u bë realitet. Kjo u quajt reforma “Brexit”, e cila shkqëputi ishullorët nga pjesa tjetër e Europës, por efektet negativë kanë qenë të menjëhershëm. Rënie e vlerësimit në bursa, por edhe rënie e vlerësimit të Paundit britanik, çka do të thotë se në ekonomi ata nuk kanë vlerësim si 10 ditë më parë.
Por, pa mbushur ende një javë, Anglisë i duhet që të japë “dorëheqje” edhe nga Kampionati Europian. Islanda i ka detyruar të largohen nga kompeticioni më i madh i futbollit në kontinentin e vjetër, duke i mundur me rezultatin 1-2. Kanë qenë të parët anglezët që kanë shënuar me kapitenin Rooney nga pika e bardhë e 11-metërshit, ndërsa reagimi i islandezëve ka qenë i shpejtë, të cilët barazuan me Sigurdsson. Por, pas 12 minutash ata shënojnë dhe golin e dytë me Sigthorsson, duke e mbajtur këtë rezultat deri në përfundim të ndeshjes.
https://www.youtube.com/watch?v=iVuTMpaGus4
Islanda kalon në fazën çerekefinale të Europianit, duke befasuar të gjithë si skuadër debutuese që shkon kaq larg në këtë kompeticion, duke mundur edhe Anglinë e yjeve. Ndeshjen e radhës do ta zhvillojë përballë Francës, ku me atë që dhuroi sot, nuk do të jetë çudi që të surprizojë edhe “Gjelat”.
Angli – Islandë 1-2
Shënues: Rooney 5′ / Sigurdsson 6′, Sigthorsson 18′
Anglia: Hart, Walker, Rose, Cahill, Smalling, Sterling, Kane, Rooney, Sturridge, Dier, Alli. Trajner: Roy Hodgson
Skema: 4-3-3
Islanda: Halldórsson, B. Sævarsson, R. Sigurdsson, Gudmundsson, B. Bjarnason, Sigthórsson, G. Sigurdsson, Árnason, Bödvarsson, A. Gunnarsson, A. Skúlason. Trajner: Lars Lagerbäck
Skema: 4-4-2
Gjyqtarë: Damir Skomina, Jure Praprotnik, Robert Vukan (Slloveni)
Stadiumi: Stade de Nice
