Kualifikimi i Real Madrid përballë Manchester City në Champions League është tema kryesore e futbollit botëror. Një finale e parakohshme e fituar nga madrilenët që shihen si favoritët kryesor për fitimin e Champions League, për herë të 15-të në histori.
Loja në mbrojtje e Los Blancos ka sjellë kritika pas kualifkimit dhe një ndër ta është edhe trajneri i njohur Rraman Hallaçi. Me një postim në InstaStory, tekniku kuksian ka analizuar superndeshjen e mbrëmshme.
“Real Madrid bëri ndeshjen më të dobët të historisë duke u mbrojtur në 16 metrat e fundit si asnjëherë tjetër më parë. Manchesteri luajti futbollin modern me shumë pasime, na kujtoi Barcelonën tiki-taka.
Por, në fakt kur skuadra bënte 50 pasime, disa tifozë anglezë filluan fërshëllimat, ndoshta kanë të drejtë pasi kërkojnë më shumë krosime me gjuajte drejtim portës sepse janë mësuar të rrinë në këmbë kur loja të jep emocione gjatë minutave.
Në fakt për t’u fërshëllyer ishte loja e Realit, por çfarë ndodhi. Reali filloj të mbrohej si një bunker dhe në përfundim tifozat e Realit ishin në delirë ndërsa të Manchesterit të zhgënjyer. Mendoj që nga kjo ndeshje mësuam që nëse trajnerët do të mundohen që skuadrat e tyre të mbajnë topin në zotërim dhe në fund skuadra e tyre eliminohet atëherë kjo nuk vlen.
Ancelotti tregoi nëse do triumf duhet të fitosh me atë stil që luajti Reali. Fakt është që Reali u kualifikua dhe po shkon drejt finales.”
