“Partizani” është ankuar te drejtuesit e bashkisë së Tiranës për stadiumin “Selman Stërmasi”. Lajmin e konfirmoi dje në mbrëmje Edmond Haxhia, drejtori sportiv i Partizanit në studion e “Procesit Sportiv” të Ed Manushit, ku deklaroi se ekipi i Partizanit, është ankuar zyrtarisht te Bashkia e Tiranës, konkretisht te kryetari i saj, Erjon Veliaj dhe nënkryetari Arbi Mazniku për lidhjen e kontratës së KF Tirana me Korabin për të zhvilluar në “Selman Stërmasi” ndeshjet e Partizanit.
“Nuk e dimë pse Tirana nuk na e dha stadiumin dhe lidhi kontratë me Korabin. Genc Tomorri e di shumë më mirë këtë gjë. Ata duhet të vinin të na thoshin se do të duhet të sillnim ofertën për të luajtur. Kur u interesuam, nga Tirana na u tha se kishin lidhur kontratë me Korabin” tha dje Haxhia.
“Për këtë, ne madje informuam zyrtarisht edhe Bashkinë e Tiranës, sepse mesa dimë është aksionere. Ku u thamë se ai është stadium i kryeqytetit. Edhe Partizani është i kryeqytetit. Por më pas fajin e kishte FSHF. Ajo zgjodhi të njohë kontratën me Korabin. Ajo duhet ta vendoste këtë gjë. Pse duhet të vijë Korabi të udhëtojë 100 kilometra për të luajtur mes Tiranës dhe ne të zhvendosemi në Elbasan? Sigurisht që kjo ka dhe kosto” deklaroi Haxhia.
Murat Basha, tifoz e mbështetës i Tiranës e kundërshtoi. Duke kujtuar në emision se gjithçka ka të bëjë me vonesat e Partizanit dhe faktin se nuk e di ça priste.
“Kam qenë prezent në shumicën e debateve që janë bërë për këtë çështje. Nuk mund të pretendojë Partizani që të kërkojë Tirana ta kontaktojë për të shkuar apo jo në stadium e për të firmosur kontratë. Duhet ta bëjë ekipi që ka nevojë. Kështu, kur Partizani u kujtua që duhet të gjente stadiumin, tre ditë përpara hedhjes së shortit për përcaktimin e datave, ishte mbyllur kontrata me Korabin. Ky pretendim nuk qëndron” tha Basha.
Si është e vërteta?
Të dy skuadrat duket se nuk kanë dashur të luajë Partizani në Selman Stërmasi. Fakti që Partizani u vonua aq shumë në propozimin e vet, do të thotë se ka kërkuar alternative të tjera përpara se të mbërrijë në “Selman Stërmasi”. Kjo ka garantuar Tiranën që të firmosë kontratë me Korabin si për stadiumin dhe kompleksin sportiv “Skënder Halili”.
Edhe tifozët e Tiranës nuk do të donin që “Partizani” të luante në shtëpinë e tyre. Sidomos dhe pas ndeshjes së fundit, kur tifozët e Partizanit thyen shumë nga stolat në shtëpinë e rikonsktruktuar të Tiranës. Por ndërkohë, nuk ishte detyrë e drejtuesve të Tiranës që të kontaktonin ata të Partizanit në çdo rast.
“Partizani” duhej që një muaj para hedhjes së shortit të sillte propozimin dhe të fillonte negociatat për të marrë me qira stadiumin ku luan Tirana.
Lexo gjithashtu
