Partizani ka apeluar dënimin me 4 ndeshje pa tifozë dhënë nga Disiplina. Përmes një deklarate për shtyp, klubi i kuq sqaron dhe argumenton juridikisht, mbrojtjen ndaj këtij vendimi, ndërsa pranon se ky është shansi i fundit që Partizani i jep strukturave të FSHF që nëse u ka mbetur ndopak cipë morali, dinjitet profesional dhe mbi të gjitha dëshirë për të organizuar një kampionat me sadopak integritet gare, të korrigjojnë veten dhe të ndreqin vendimin në apel.
"ZYRA JURIDIKE E KLUBIT APELON VENDIMIN E KOMISIONIT TE DISIPLINES
Duke dashur t'ju bëjmë me dije se kemi depozituar kërkesën ankimore prane Komisionit të Apelit në FSHF, pas vendimit skandaloz të rradhës të Komisionit të (In)Disiplinës të FSHF-së, gjejmë sërish rastin të reagojmë edhe një herë publikisht duke denoncuar paligjshmërin totale të këtyre akteve të cilat destabilizojnë dhe cënojnë rëndë integritetin e kësaj gare, që mesa duket telekomandohet nga përtej fushave të blerta dhe përdhos punën, mundin dhe sakrificat ekonomike të bëra për të rritur nivelin dhe cilësinë sportive tonën dhe të kampionatit.
Themi paligjshmëri absolute të vendimit, pasi është tërësisht jashtë çdo lloj logjike juridike që sjellja e gabuar e klubit mik të dënohet më shumë se sa dështimi në përmbushjen e detyrimeve për organizimin e ndeshjes të klubit vendas.
Eshtë jashtë çdo lloj parimi ligjor apo njerëzor (pavarësisht se asgjë njerëzore nuk kishte në sjelljen e tifozëve vendas) një vendim i cili mohon faktet, duke krijuar fakte inegzistente të stisura nga shkëmbimi i thashethemeve ndërmjet zyrave të Kuksit dhe FSHF-së. Dukshëm, FSHF ka gjetur mënyrën më tinzare të mundshme për të penguar FK Partizanin në realizimin e objektivave të tij.
Në kushte normale, akuzat tona do të dukeshin komplotiste dhe konspirative, por derisa FSHF çdo javë, për çdo akt tonin, korrekt apo të gabuar, njeh vetëm një mënyrë veprimi: gjoba disa-milioneshe dhe luajtje ndeshjesh pa spektatore, panorama bëhet e qartë; linja e mendimit dhe e prapamendimit bëhet e lexueshme...
I bëjmë thirrje urgjente FSHF të reformojë vetveten një kohë e më parë, pasi po bën maksimumin për të shkaterruar rritjen e mundimshme të nivelit sportiv të garës. Po bën cdo gjë për të penalizuar klubin tonë, tifozerinë tonë dhe komunitetin sportiv të cilin ne përfaqësojmë. Me një mendësi province të thellë, thuaj mesjetare, po shkatërrojnë çdo iniciativë tonën për të krijuar një model suksesi dhe për të arritur sukseset që meritojme.
Fatkeqësisht, kjo sjellje e FSHF-së po përsëritet nga viti në vit duke mbrojtur interesat e rryshfetxhinjve dhe të të privilegjuarve. Duke mos u mjaftuar vetëm në reagime publike, në mos pajtim të plotë me vendimin skandaloz, qartësisht të porositur, po u japim mundësinë e fundit strukturave të FSHF që nëse u ka mbetur ndopak cipë morali, dinjitet profesional dhe mbi të gjitha dëshirë për të organizuar një kampionat me sadopak integritet gare, të korrigjojnë veten dhe të ndreqin vendimin në apel.
Në të kundërt zotërinjtë e FSHF-së sa vijojnë të gënjejnë veten, Klubet (përveç atyre të rryshfetit, të privilegjeve apo te pakteve të fshehta alla "më lej këtë, të të lë atë"), lojtarët, që nga ai më i vogli në moshë, tifozët, si dhe komunitetin sportiv brenda e jashtë vendit që këtu ka dhe bëhet futboll apo organizohet garë sportive.
Gerald Burba
Sekretar i Përgjithshëm
Zyra Juridike e FK Partizanit", lexohet në deklaratën për shtyp të Partizanit.
Lexo gjithashtu
