Ambasada e Zvicrës ka organizuar më së miri atmosferën e ndeshjes në rezidencën e saj në Tiranë. Sipas një njoftimi të ambasadës, ato bëjnë me dije për mediat se kanë qenë mbi 250 të ftuar, mes tyre ministrat Bushati, Klosi, presidenti Nishani dhe Ambasadori Gjerman Hoffman. Ata e kanë ndjekur takimin së bashku, ndërsa nuk ka munguar dhe një deklaratë e ambasadorit zviceran, Graf, i cili është shprehur se futbolli i afron popujt.
"Mbi 250 të ftuar mbushën oborrin e Rezidencës zvicerane dhe brohoritën për skuadrat respektive. Midis figurave publike të pranishme ishin Presidenti Nishani, Ministri i Jashtëm Ditmir Bushati, Ministri i Mirëqenies Sociale dhe Rinisë Blendi Klosi, dhe Ambasadori Gjerman Hellmut Hoffman".
"Në fjalimin mirëseardhës Ambasadori zviceran Christoph Graf tha: 'Futbolli i afron popujt dhe njerëzit më shumë. Kjo ndeshje është historike sepse për herë të parë dy vëllezer luajnë kundër njëri-tjetrit, dhe sepse është hera e parë që Shqipëria merr pjesë në një kampionat të nivelit të lartë'.
"Përmes një ekrani LED 15 metra katror të ftuarit ndoqën ndeshjen e shumëpritur. Motoja e aktivitetit ishte ‘Le të brohorasim për të dy ekipet tona kombëtare’ për të simbolizuar që një përballje futbollistike mbetet një ngjarje miqësore në kontekstin e marrëdhënieve zvicerano-shqiptare".
"Një aspekt interesant i ndeshjes ishte përballja historike midis dy vëllezërve Taulant dhe Granit Xhaka të cilët luajtën në anë të kundërta: Taulanti është mbrojtësi i fortë në ekipin shqiptar ndërsa Graniti është mesfushori i talentuar i ekipit zviceran", është ky njoftimi që bën Ambasada zvicerane në Tiranë.
Lexo gjithashtu
