Portieri i Tiranës, Ilion Lika ka hedhur në gjyq Flamurtarin për shkak të rrogave të prapambetura që klubi vlonjat ka ndaj "gardianit" baardheblu. Mësohet se shuma që Lika kërkon nga Flamurtari është rreth 6 milionë lekë të rinj.
Edhe pse lojtari nuk ka dashur që kjo situatë të shkojë në këtë situatë, pasi ka dashur të gjejë një zgjidhje direkte me klubin, kjo gjë nuk ka ndodhur dhe tiransi ka qenë i detyruar të trokasë në gjykatë për të zgjidhur këtë situatë.
Saktësisht "lufta" mes palëve do të zhvillohet në Dhomën e Zgjidhjes së konflikteve, ku do të merret dhe vendimi përfundimtar. Pagat e prapambetura që zëvendëskapiteni i Tiranës kërkon janë ato të vitit 2015.
Por, Lika nuk është i vetmi që ka këtë problem, pasi një çështje të tillë kanë hapur edhe katër ish-futbollistë të tjerë të Flamurtarit. Bëhet fjalë për Argent Alilajn, Hektor Idrizajn, Ardit Shehajn dhe Donjet Shkodrën, të cilët kanë të njëjtin problem.
Edhe çështja e katër futbollistëve në fjalë është çuar në DHZK. Mësohet se ky komision juridik do t'i mbledhjë të gjitha çështjet në një dhe do të japë një verdikt përfundimtar. Në total kostoja që Flamurtari duhet të paguajë ndaj të pestë futbollistëve shkon në 20 milionë lekë të rinj.
Lexo gjithashtu
