Mathew Boniface ishte një nga lojtarët e afruar te Partizani në merkaton e janarit të 2017-tës. Sulmuesi afrikan erdhi me bujë tek të kuqtë, por ajo që dha në fushë ishte shumë larg pritshmërive. Kësisoj, aventura e tij te kryeqytetasit ishte shumë e shkurtër. Pikërisht për këtë transferim të kryer para 3 viteve, Partizani mund të ishte gjobitur dhe jo pak, plot 400 mijë euro.
Aris Limasol kishte çuar çështjen në FIFA me pretendimin se sulmuesi i tyre është aktivizuar tek të kuqtë pa lejen e tyre. Problemet me federimin bënë që Skënderbeu të hiqte dorë nga ai në vitin 2016-tën, për shkak të konfuzionit të krijuar pikërisht nga Aris Limasol.
Asokohe bardhekuqtë e huazuan Bonifacen te Trepça ’89 dhe është pikërisht klubi kosovar që duhet të paguajë dëmshpërblimin e kërkuar Aris Limasol. Duke qenë se Boniface është aktivizuar fillimisht me Trepça ’89, Partizani ia ka hedhur “paq” dhe pas afro 2 vitesh seancash gjyqësore, ka dalë i “larë” nga kjo situatë.
Për vetëm 122 minuta të aktivizuara, kryeqytetasit mund të kishin paguar plot 400 mijë euro në arkat e klubit qipriot, por fatmirësisht ekipi shqiptar ka dalë i “palagur” nga kjo “gjullurdi”.
Lexo gjithashtu
