Andrea Agostineli nuk do të jetë më trajner i Skënderbeut. Ashtu si newsport.al bëri me dije para disa ditësh, edhe klubi korçar përmes një njoftimi në faqen zyrtare, bën me dije që italiani dhe drejtuesit bardhekuq kanë zgjidhur me mirëkuptim kontratën dhe tashmë vendin e tij do ta zejë, ish trajneri i Tiranës, Ilir Daja.
“Pas dy fazave të para, drejtuesit e Klub Futboll ‘Skënderbeu’ kanë arritur të zgjidhin me mirëkuptim kontratën me teknikun italian Andrea Agostinelli.
Pavarësisht besimit që trajneri kishte nga drejtuesit, rezultatet e deritanishme që skuadra ka arritur nuk shkojnë për shtat me objektivat e klubit, ndaj i urojmë suksese Agostinellit në karrierën e tij!
Skuadra do të nisë përgatitjet në Antalya në datën 6 Janar dhe në krye të pankinës është zyrtarizuar trajneri Ilir Daja, prezantimi të cilit do të bëhet në datën 4 Janar në orën 12:00 në rezidencën e kampionëve në “Tropikal Resort” në Durrës!”, shkruhet në njoftimin e klubit të Skënderbeut
Kujtojmë që Andrea Agostineli e mori nën drejtim skuadrën korçare në këtë sezon të ri futbollistik, megjithatë aventura e tij te kampionët nuk ka zgjatur më shumë se dy faza. Me në krye italianin, Skënderbeu arriti të renditej në vendin e 3-të, duke lënë shije të hidhur tek drejtuesit e klubit.
