Përpara nisjes së çdo ndeshjeje, çdo trajner thotë fjalët e fundit përpara mediave. Hasan Lika, trajneri i Vllaznisë bashkë me skuadrën ka përgjegjësinë e madhe për të vendosur nderin në vend të ekipit shkodran duke e rikthyer në kupolën e futbollit shqiptar. Për ndeshjen e nesërme me Korabin që ngre siparin e edicionit të 71-të Kategorisë së Parë tekniku kryeqytetas ka garantuar se ekipi i tij do të jetë konkurues këtë edicion dhe do të triumfojë falë mbështetjes së tifozëve.
"Skuadra është gati për të nisur kampionatin. Me kohën që kemi patur në dispozicion kemi bërë më të mirën. Jam i kënaqur me mënyrën si shkuan gjërat, por edhe me lojtarët e ardhur. Besoj se Vllaznia ka për të qenë kompetitive dhe do të nisë ashtu si duhet rrugëtimin e saj drejt rikthimit në Superiore.
E kemi marrë shumë seriozisht startin e kampionatit dhe dëshirojmë ta nisim me një fitore ndaj Korabit. Kuptohet që ndaj çdo kundërshtari do të jetë e vështirë, sepse cilido synon fitoren, aq më tepër ndaj një emri të madh si Vllaznia. Personalisht kam besim te skuadra, por shpresoj edhe te mbështetja e tifozëve. Të gjitha palët të bashkuar do t'ia dalim me sukses për ta nisur mbarë kampionatin", deklaroi në konferencën trajneri i njohur i futbollit shqiptar Hasan Lika.
Lexo gjithashtu
