Edi Rama ka qenë sot i pranishëm në Kukës duke inspektuar punimet në stadiumin e ri që po ngrihet në qytetin verilindor. Edhe pse ende s’ka një përgjigje se kur do të rinisë futbolli, kryeministri nuk nguron të shpejtojë për të qenë në Kukës për të reklamuar punimet e shtëpisë së ekipit nënkampion, ku në fakt një pjesë e mirë e investimit po bëhet nga Federata Shqiptare e Futbollit. I shoqëruar nga presidenti Safet Gjici, njëkohësisht kryebashkiak i këtij qyteti, i pari i qeverisë u mundua të shihte me “detaje” gjithçka.
Edhe pse futbollit i ka kthyer gjithmonë shpinën, në të tilla raste kryeministri, kur ka investime apo arritje të rëndësishme sportive, nuk “përton” t’i shkojë nga pas për të marrë meritat. Në një bashkëbisedim me të parin e qeverisë, Gjici i tregoi një pjesë të veçantë: “Shumë njerëz vijnë e hipin në cepet e mureve dhe shohin se si ecin punimet. Madje ka nga ata që më marrin në telefon dhe më thonë: Kryetar, sot firma ka sjellë më pak punëtorë. Çfarë ka ndodhur?”, përfundoi duke qeshur Gjici, ndërsa kryeministri ishte mjaft i fokusuar në “kantierin e ndërtimit”…
“Kukës - Jo vetëm një stadium i ri i denjë për sportdashësit e për skuadrën që lufton rregullisht për fronin kombëtar të futbollit, po edhe një qendër e re graviteti e zhvillimit social të një komuniteti, ku zotimet e mbajtura po rilindin shpresën tek e ardhmja, që do të marrë formë me projekte të mëtejshme të Rilindjes Urbane dhe Ekonomike të Kukësit e të krejt qarkut verilindor”, shkruhej në kanalin zyrtar të kryeministrit.
Duket si karshillëk për vëllain e tij, Olsi Ramën që drejton Partizanin, duke theksuar që verilindorët luftojnë rregullisht për fronin kombëtar të futbollit.
Lexo gjithashtu
