Lajmi për largimin e mundshëm të Ilir Dajës nga Ballkani po merr dhenë në Kosovë e Shqipëri. Trajneri më i mirë shqiptar pritet të jetë pa ekip pas javës që vjen. Ndeshja e rradhës dhe e fundit e tij në krye të suharekasve pritet të jetë ajo ndaj Larnes, sfida e kthimit në raundin e tretë të Conference League.
Mbyllja e aventurës europiane do të sjellë edhe fundin e epokës Daja në krye të rekordmenëve dardan. Edhe pse trajneri tiranas ka 2 vite kontratë, ajo pritet t’i shkëputet nga kryesia e klubit.
Largimi nga Ballkani nuk do të thotë pushim për Ilir Dajën. Përkundrazi, tekniku 57-vjeçar përgatitet për një rikthim të bujshëm në Superiore. Është Dinamo, klubi i zemrës së Dajës, dhe presidenti Ardian Bardhi që e ka në krye të listës së dëshirave për Dinamon e tij të ardhshme.
Vetë Daja ka shprehur hapur dëshirën për t’u rikthyer në një prej 3 ekipeve të kryeqytetit dhe aktualisht vetëm Dinamo duket në gjendje për ta kryer këtë megatransferim.
Megjithatë, në rradhë të parë mbetet të qartësohet gjithçka nga vetë klubi i Ballkanit për të ardhmen e trajnerit Daja dhe stafit të tij.
Lexo gjithashtu
