Pasi mbyllën sezonin në vendin e parë dhe pas fitimit të Kupës së Shqipërisë, Egnatia siguroi menjëherë 150 milionë lekë nga bonuset e FSHF-së.
Pjesëmarrja në Europë i garanton gjithashtu 325 mijë euro të tjera që do të vijnë nga UEFA për kualifikimin në Europë, por, ‘Bingo’ e madhe është titulli kampion. Nëse ia dalin të shpallen kampion, klubi rrogozhinas do të përfitojë 100 milionë lekë të tjera nga FSHF, ndërsa 100% të garantuara ka 1 milion e 110 mijë euro nga prania në kompeticionet europiane, edhe nëse nuk arrin të kalojë asnjë tur.
Egnatia synon të thyejë rekordin e Partizanit që vitin e fundit akumuloi plot 1.4 milionë euro nga UEFA e FSHF dhe një skenar i tillë i sipërpërmendur e barazon këtë shifër. Megjithatë, dejtuesit kanë objektiv kalimin e të paktën një turi që do ta ngrinte shpërblimin në 1.5 milionë euro direkt nga UEFA.
Kujtojmë që UEFA vendosi të rrisë shpërblimet e skuadrave për turet europiane teksa pjesëmarrja në raund tani vlerësohet 175 mijë euro nga 100 mijë që ishte deri vjet. Kalimi i çdo turi nis nga 150 mijë euro dhe rritet me nga 200 mijë në çdo raund.
Nëse arrihet kualifikimi në grupe, bonuset zerohen dhe skuadrat përfitojnë një kuotë fikse prej 18.62 milionë euro për Championsin, 4.31 për Europa League ose 3.17 për Conference League.
Lexo gjithashtu
